जसपाका कार्यकर्ताहरुले राजविराजमा जलाए डा. सिके राउतको पुतला

न्यूज ब्यूरो, राजविराज । जनमत पार्टीका राष्ट्रिय अध्यक्ष एवम् प्रतिनीधिसभा सदस्य डा. सिके राउतको पुतला दहन गरिएको छ ।

मधेश प्रदेशको सप्तरी जिल्लाको सदरमुकाम राजविराजस्थित डा. राउतको पुतला दहन गरिएको हो । डा. राउतले मधेशी भाषामा सपथ लिएको भन्दै जसपा निकट विभिन्न सँघ सँस्थाका पदाधिकारीहरु सम्मलित जसपाका कार्यकर्ताहरुले डा. राउतको पुतला दहन गरेको छ ।

सप्तरी जिल्ला निर्वाचन क्षेत्र नम्बर २ बाट प्रतिनीधिसभा सदस्यमा निर्वाचित भएका डा. राउतले विहिबार संघीय संसदमा पद तथा गोपनीयताको सपथ मधेशी भाषामा लिएपछि जसपाका कार्यकर्ताहरुले उनको पुतला दहन गरेको छ ।

उनले मैथिली नभनेर मधेशी भाषा भनेपछि मैथिली भाषा विकासको लागि स्थापना गरिएको सँघसँस्थाहरुले समेत उनको विरोध गरेको छ ।

मैथिली भाषी क्षेत्रबाट निर्वाचित भएका डा. राउतले सँसदमा मधेशी भाषाको पहिचान उल्लेख गरेपछि मैथिली भाषासँग सरोकार राख्ने संघसँस्थाहरुले उनको विरोध गरेको छ ।

सो क्रममा मैथिली साहित्य परिषदका अध्यक्ष सतिश कुमार दत्त, आईलभ मिथिला डटकमका अध्यक्ष विद्यानन्द यादव र मिलाफका अध्यक्ष रमिला शाहले सँयुक्त प्रेस विज्ञप्ति जारी गरी विरोध जनाएको छ ।

उनीहरुले भाषाको सूचिमा मधेशी भाषा कतै नरहेको उल्लेख गर्दै मैथिली भाषाको अपमान समेत गरेको आरोप लगाएका छन् ।

यता, डा. राउतले मधेशमा बोलिने भाषा मधेशी भाषा हो भन्दै मधेशी भाषा स्थापनाको लागि मधेशी भाषा भनेर सपथ लिएको प्रतिक्रियाहरु दिएका छन् । मधेशी भाषाको सुरुवात भएको उनले प्रतिक्रिया मिडियाहरुमा दिएका छन् ।