जनकपुरः घुससहित रँगेहात पक्राउ परेका सई चौधरी निलम्बनमा

न्यूज ब्यूरो, जनकपुरधाम । मधेश प्रदेशको राजधानी जनकपुरधामको जटहीबाट घुससहित रँगेहात पक्राउ परेका प्रहरी सई देवकीलाल चौधरी निलम्बनमा परेका छन् ।

अख्तियार दुरुपयोग अनुसन्धान आयोगले उनलाई गत कार्तिक १७ गते धनुषाको जटही नाकाबाट ४ हजार रुपैयाँ घुससहित रँगेहात पक्राउ परेको थियो ।

अख्तियार दुरुपयोग अनुसन्धान आयोगले आईतबार बिशेष अदालतमा चौधरी विरुद्ध आरोपत्र दायर गरेको छ । आरोप पत्र दायर भएलगत्तै उनी कानुनतः निलम्बनमा परेका छन् ।

धनुषाको नगराइन नगरपालिका वडा नम्बर २ जटहीस्थित पसलका संचालकसँग पसल संचालन गर्न महिनावारी रुपमा रकम दिनुपर्ने अन्यथा पसल संचालन गर्न नदिने भनी सीमा प्रहरी चौकी, लगमा, जटही, धनुषामा कार्यरत प्रहरी नायव निरीक्षक देवकी लाल चौधरी घुस मागेको र अपरेशनको आधारमा उनलाई रँगेहात पक्राउ गरेको थियो ।

उजुरी निवेदनको आधारमा अख्तियार दुरुपयोग अनुसन्धान आयोगको कार्यालय, बर्दिवासबाट खटिई गएको टोलीले चौधरीलाई सेवाग्राहीसँग रु.४,००० (चार हजार रुपैयाँ) घुस लिइसकेको अवस्थामा कार्तिक १७ गते साँझ नियन्त्रणमा लिइएको थियो ।

अनुसन्धानको सिलसिलामा चौधरीले आफ्नो कार्यालयको मोटरसाइकल बनाउने बहाना गरी व्यवसाय संचालन गरेवापत गैरकानुनी रुपमा १७ गते ४ हजार र सोही कार्यको लागि सोभन्दा अगाडि रु.५ हजार गरी जम्मा ९ हजार रुपैयाँ घुस रिसवत माग गरी लिएको देखिएको उल्लेख गरिएको छ ।

उनीमाथि भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को खण्ड (क) बमोजिमको कसुर भएकोले देवकी लाल चौधरीलाई रु.९,०००।– (नौ हजार रुपैयाँ मात्र) बिगो कायम गरी भ्रष्टाचार निवारण ऐन, २०५९ को दफा ३ को उपदफा (१) र ऐनको दफा ३ को उपदफा (१) को देहाय (क) बमोजिम कैद र विगो बमोजिम जरिवाना गरी विगो जफत हुन मागदाबी लिई भ्रष्टाचार निवारण ऐन, २०५९ को दफा ३६ तथा अख्तियार दुरुपयोग अनुसन्धान आयोग ऐन, २०४८ को दफा १८ र ३५ बमोजिम आज विशेष अदालत, काठमाडौंमा आरोपपत्र दायर गरिएको छ।