उपमेयरको दादागिरी: अनुगमनको नाममा स्कूल पसेर विद्यार्थीकै सामुन्ने हेडमास्टरलाई हुल–हुज्जत

न्यूज ब्यूरो, सिरहा । महिलासँग अभद्र व्यवहार आरोप खेपेका सिरहाको लहानका उपमेयर राम चलितर महतोले अनुगमनको नाममा आफ्नो भ्रास निकालेको देखिएको छ ।

लहान नगरपालिका अन्तर्गत पर्ने केही समुदायिक विद्यालयमा मँगलबार अनुगमनको क्रममा समुदायिक विद्यालय पुगेका उपमेयर राम चलितर महतोले पदीय दम्भ देखाउँदै शिक्षकहरुसँग दुरव्यवहार गरेका छन् ।

सोही क्रममा आधारभुत विद्यालय बलानसेरमा उपमेयरले अनुगमनको क्रममा प्रधानाध्यापक (हेडमास्टर) मदन कुमार मण्डललाई बालबालिकाहरुको सामुन्नै दुरव्यवहार गरेका छन् ।

उपमेयर महतोले अनुगमन भन्दै सो विद्यालय पसेको बेला प्रधानाध्यापक मण्डलमाथि दुरव्यवहार गरी पदीय दम्भ प्रदर्शन गरेको देखिएको छ ।

बालबालिकाहरुलाई कक्षामा पढाईरहेको बेलामै कक्षा भित्र पसेर उपमेयर महतोले प्रधानाध्यापक मण्डलसँग कक्षा सफाईको बारेमा जिज्ञासा राखेका थिए । सो क्रममा आफू बालबालिकाहरुलाई पढाउने गरेको र सफाईको लागि कर्मचारी रहेको जवाफ दिएपछि उपमेयर महतो तातिएका थिए ।

सो क्रममा उपमेयर महतोले कक्षाको सफाई, विद्यालयको सफाई पनि हेडमास्टरले नै गर्नुपर्ने आवेग देखाएपछि दुवै जनाबीच केही चर्काचर्की समेत भएको भिडियोहरु समाजिक सँजालमा पोष्ट भएको देखिएको छ ।

प्रअ मण्डलले सफाई कर्मचारी रहेकोमा आज विद्यालय नआएको जवाफ फर्काएपछि मण्डललाई उपमेयर महतोले हेडमास्टरलै नै कक्षा बढार्नुपर्ने भनेपछि चर्काचर्की भएको थियो ।

देखाबटी अनुगमनको लागि क्यामेरामेन सँगै लगेका उपमेयर महतोले एक शिक्षकमाथिको दुरव्यवहारलाई आफ्नो पदीय जिम्मेवारी सम्झेर तानाशाही शैली प्रदर्शन गरेको देखिएको छ ।

नियमित अनुगमन गरी समुदायिक विद्यालय सुधारको प्रयास र सुरुवात राम्रो भएपनि उपमेयरको तौर तरिकाले एक विद्यालय प्रमुखमाथि दुरव्यवहार भएको हो । अनुगमनको क्रममा प्रतिवेदन तयार गरी आवश्यक कारवाहीको लागि कदम उठाउनुपर्नेमा उपमेयर महतोले तथाकथित अनुगमनको नाममा शिक्षकमाथि गालीगलौज गरेको हो ।