जसपा र काँग्रेसमा सिटभन्दा बढी सिफारिस, मनिष सुमनसहित यी ४ जनाको नाम हटाउने सम्भावना

न्यूज ब्यूरो, जनकपुरधाम । उपेन्द्र यादव नेतृत्वको जनता समाजवादी पार्टी (जसपा) नेपालले पाएको सिटभन्दा अधिक जनाको नाम सिफारिस गर्दा भाँडभैलो भएको छ ।

जसपाले मधेश प्रदेशमा ७ जना सभासदको नाम सिफारिस गर्नुपर्नेमा नेताहरुबीच सहमति हुन नसक्दा १० जनाको नाम सिफारिस गरिएको छ ।

जसपाले प्राप्त गरेको प्रत्यक्षतर्फ ९ र समानुपातिकतर्फ ७ गरी कुल १६ सिट प्राप्त गरेको छ ।त्यस मध्ये ६ जना महिला समानुपातिकबाट र एकजना पुरुष मात्र चयन हुने छन् ।

जसपाले गरेको सिफारिसमा ७ जना महिला र ३ जना पुरुष छन् । अल्पसंख्यकबाट मनिष सुमन, मुसलिमबाट युसुफ साफी र दलितबाट चन्देश्वर सदाको नाम सिफारिस गरिएको छ ।

पुरुषतर्फबाट दलितको सूचीमा १ नम्बरमा रहेका चन्देश्वर सदाको संभावना बलियो रहेको स्रोतले जनाएका छन् ।स्रोतका अनुसार सुमन र साफीको नाम हटाइने तयारी गरिएको छ । महिला तर्फबाट ७ जना रहेकोमा त्यस मध्ये ललिता दास र ममता मण्डल २ जनाको नाम हटाइने संभावना छ ।

दलितबाट पुरुष सदालाई चयन गरि महिला कलस्टरबाट ललिता दास र जनजातीबाट रहेकी ममता मण्डलको नाम हट्ने छ ।

आयोगले पार्टीलाई पठाउने पत्रमा कल्स्टर मिलाएर आवश्यक संख्या ७ को नाम नै राख्न भन्नेछ ।सोमवार सम्म नाम सच्याउने समय निर्धारण गरिएको छ । आयोगले समानुपातिकतर्फ निर्वाचित हुने प्रतिनिधि र प्रदेश सभा सदस्यहरुको नाम मंगलवार सार्वजनिक गर्ने जनाएको छ ।

सोही क्रममा नेपाली कांग्रेसले प्रतिनिधि र प्रदेश दुबै तर्फको समानुपातिक सांसदहरुको सूची पठाउँदा निर्वाचन आयोगले निर्धारण गरेको कल्स्टर अनुरुप नरहेको देखिएको छ ।

समानुपातिकतर्फ नेताहरुमा सहमति हुन नसकेपछि समानुपातिकतर्फ प्राप्त गरेको भन्दा बढी सिट पनि सिफारिस गरिएको छ ।

नेपाली कांग्रेसले मधेश प्रदेशमा १ जना मात्र पुरुषको सिफारिस गर्नुपर्ने हो ।कांग्रेसले प्रत्यक्षमा १३ र समानुपातिकमा ९ स्थान पाएको छ । विभिन्न कल्स्टरबाट ८ जना महिला र मधेशी पुरुषबाट १ जनालाई राख्नु पर्ने हो । तर नेताहरुले आयोगको सूची विपरीत मधेशी तर्फको १ नम्बरमा रहेका कुमरकान्त झालाई हटाएर अल्पसंख्यक सूचीमा रहेका राकेश सिंहको नाम सिफारिस गरिएको छ ।

मधेश प्रदेशमा पहिलो प्राथमिकतामा मधेशी कल्स्टरलाई राखिएको छ । कांग्रेसका केही नेताहरुले अनुचित लाभको प्रलोभनमा परेर झाको नाम हटाएको आरोप नेकांका युवा नेता धीरेन्द्रमोहन झाले लगाएका छन् ।‘निर्वाचन आयोगको प्राथमिकता क्रम अनुसार मधेशीबाट १ नम्बरमा रहेका झाको नाम सिफारिस हुनुपर्छ’ उनले भने, तर अल्पसंख्यकबाट महिला र पुरुष समेतलाई राखेर आयोगले बनाएका कल्स्टर विपरीत सिफारिस गरिएको छ ।

जसपा र काँग्रेसको सिफारिस

जसपा	काँग्रेस
बिन्दु कुमारी यादव	मिना कुमारी लामा
किरण कुमारी साह	सकुन्ती देवी महरा
शोभा देवी	निलम कुमारी रजक
सँजीला कुमारी यादव	राकेश सिँह
चन्देश्वर सदा	रेखा ठाकुर
ललिता दास	जिवछी यादव
सैदा खातुन	ईन्दु कुमारी साह
ममता मण्डल	अन्जना पण्डित
मो. युसुफ अलि	नुरुन नेसा
मनिष कुमार सुमन

नेताहरुका अनुसार मधेश प्रदेशमा सहमति हुन नसकेपछि राति १ बजे मापदण्ड मिच्दै सिफारिस गरिएको थियो । पार्टीले गरेको सिफारिस विरुद्ध कुमरकान्त झाले आयोगमा उजुरी दर्ता गरेका छन् ।‘विधि प्रक्रिया अनुसार पार्टीले सिफारिस गर्नुपर्ने हो’ पीडित झाले भने, पार्टीका केही नेताहरुले मापदण्ड मिचेर म माथि अन्याय गरेका हुन् ।

निर्वाचन आयोगले गल्ती सच्याउन दलहरुलाई दिएको समयावधि भित्र कांग्रेसले मधेश प्रदेशको सभासद सिफारिसको सूचीलाई सच्याउनेमा विश्वस्त रहेको झाले बताए । स्रोतहरुका अनुसार पर्सा जिल्लाको निर्वाचन क्षेत्र नम्बर ४ बाट प्रतिनिधिसभामा निर्वाचित रमेश रिजालले सिंहसित ३० लाख रुपैयामा ‘डिल’ गरेका छन् ।

प्रक्रिया मिचेर गरिएको सिंहको सिफारिसको कारण अल्पसंख्यक महिलामा रहेका इन्दुकुमारी साह र अञ्जना पण्डित मध्ये एकजना महिलालाई अर्को कल्स्टरमा राख्नु पर्ने बाध्यात्मक स्थिति आएको नेताहरुले बताएका छन् ।

अत्यन्त विपन्न परिवारबाट कांग्रेस पार्टीमा झण्डै ४ दशकदेखि सक्रिय, जेल र थुनामा समेत परेका झालाई हटाउँदा पार्टीमा समेत व्यापक असन्तुष्टि देखिएको युवा नेता घनश्याम यादवले बताए । झा हाल धनुषा कांग्रेस क्षेत्र नम्बर ४ का क्षेत्रीय सभापति हुन् ।