हुलाकी सडकमा टायर बालेर चक्काजाम

सर्लाही, २५ मँसिर । मधेश प्रदेशको सर्लाही जिल्लास्थित हुलाकी सडकमा बिहानैदेखि चक्काजाम भएको छ ।

सर्लाही जिल्ला अन्तर्गतको हुलाकी सडक निर्माणमा ढिलाइ भएको भन्दै स्थानीयहरुले बिहानैदेखि आन्दोलित भएका छन् । उनीहरुले ढिलासुस्तीले गर्दा वर्षामा हिलो र हिउँदमा धुलाम्य सडक हुँदा आवतजावतमा समस्या हुने गरेको भन्दै चक्काजाम गरेको हो ।

सर्लाहीको ब्रहमपुरी गाउँपालिकाका युवाहरुले संयुक्त रुपमा हुलाकी राजमार्गमा टायर बालेर प्रदर्शन गरिरहेका छन् ।

तराईको लाईफलाईन मानिएको हुलाकी राजमार्ग निर्माणमा लापरवाही गरेको र जनताको स्वास्थ्यमा खेलवाड गरेको भन्दै स्थानिय युवाहरूले प्रदर्शन समेत गरिरहेका छन्।

हुलाकी राजमार्ग समयमै बनाउने भनेर प्रतिवद्धता गर्ने र अलपत्र छाड्ने गरेको कारण नेता र नेतृत्वबाट पटक पटक धोका भएकोले आवातजावतमै रोक लगाउने निर्णय गरेर आफूहरु सडक अबरुद्ध गर्न बाध्य भएको स्थानीयहरुले बताए ।

समयमै बनाउन नसकिएपनि सडकमा नियमित पानी छर्केर धूलो उड्न रोक्ने कार्य समेत नगरेको भन्दै सडकमा उड्ने धुलोका कारण नागरिकको स्वास्थ्यमा नकरात्मक असर परिरहेको बताइएको छ ।

प्रशासनले समेत हुलाकी सडक नबनाउने ठेकेदारलाई कुनै कार्वाही नगरेको भन्दै अब जनताले नै निर्णय गर्ने भन्दै आफूहरु सडक अवरुद्ध गर्न अघि बढेको बताए । उनले तत्काल सडकमा पानी छर्कने काम गरे र सडक छिट्टै बनाउने प्रतिवद्धता भएमात्रै सडक खुलाउने बताए ।

हुलाकी राजमार्ग नबन्दा स्थानीयले वर्षौदेखि सास्ती भोग्नु परेको छ। जिल्ला प्रहरी कार्यालय सर्लाहीका अनुसार अवरोध सडक खुलाउने प्रयास भइरहेको छ । अहिले राजनीतिक दलका नेता, स्थानीय र ठेकादारबीच छलफल भइरहेको छ ।