बृहत्तर जनकपुरका पूर्व अध्यक्ष सिँह सिँहदरवारबाटै सरकारी गाडी लिएर फरार, प्रहरी खोज्दै

न्यूज ब्यूरो, जनकपुरधाम । वृहत्तर जनकपुरधाम क्षेत्र विकास परिषदका पूर्व अध्यक्ष शालिग्राम सिँह कार्यालयको सरकारी गाडी लिएर फरार भएका छन् ।

पूर्व अध्यक्ष सिँहले सिँहदरबारभित्र रहेको सँस्कृति, पर्यटन तथा नागरिक उडयन मन्त्रालयबाट दिउँसो सरकारी गाडी लिएर फरार भएको हो ।

वृहत्तर जनकपुर क्षेत्र विकास परिषदको नाममा रहेको बा २ झ ३०५३ नम्बरको सेतो प्लेटको आईसुजु डब्बल केबिनको सरकारी गाडी लिएर फरार भएको बताईएको छ ।

पदबाट हटेपछि पनि अनाधिकृत रुपमा ७ महिनासम्म सरकारी गाडी दुरुपयोग गरेका सिँहले शुक्रबार दिउँसो १ः३५ बजेतर्फ गाडी नै लिएर फरार भएको वृहत्तर जनकपुर क्षेत्र विकास परिषदका वर्तमान अध्यक्ष शितल साहले जानकारी दिए ।

सवारी चालक धनीराम मण्डलसँग उनले गाडीको साँचो लिएर गाडी लिई फरार भएको साहले जानकारी दिए । उनका अनुसार, सिँहको कार्यकालमै सवारी मर्मतको लागि करिब ३ लाख रुपैयाँ कुनै ग्यारेजको बाँकी बक्यौता रहेकोमा उनले गाडी लिएर फरार भएका हुन् ।

साहका अनुसार, वृहत्तर जनकपुर क्षेत्र विकास परिषद्को अवस्था अस्तव्यस्त रहेकोमा ट्रयाकमा ल्याउने प्रयास गर्दै गर्दा पूर्वअध्यक्षले सरकारी गाडी लिएर भाग्नु लज्जास्पद रहेको बताए ।

उनले सरकारी गाडीको मर्मत सम्भारको लागि विभिन्न प्रोटोकोलहरु पूरा गर्नुपर्नेमा सो नगरी पूर्वअध्यक्ष सिँहले आफूखुसी मर्मत सम्भार गराएर अहिले गाडी लिई फरार भएको बताए ।

गाडी लिएर फरार भएपछि सवारी चालक धनीराम मण्डललाई प्रहरीले अनुसन्धानको लागि नियन्त्रणमा लिएको छ । सिसिटिभी फुटेजमा मण्डलले पूर्वअध्यक्ष सिँहलाई गाडीको साँचो (चाभी) दिँदै गरेको देखिएपछि अनुसन्धानको लागि राखिएको हो ।

जानकारी अनुसार, सवारी चालक मण्डललाई पूर्वअध्यक्ष सिँहले सिँहदरबारभित्र पसेर धाकधम्की, डर, त्रास देखाएपछि उनले सहज रुपमा साँचो दिएको बुझिएको छ । यद्यपी, प्रहरीले अझै यसको पुष्टि भने गरेको छैनन् ।

यता, सो सन्दर्भमा बृहत्तरका पूर्वअध्यक्ष शालिग्राम सिँहको मोबाईल नम्बर ९८५१०४९६६१ नम्बरमा सम्पर्क गर्दा उनले फोन उठाएनन् । सिँहदरबार प्रहरी वृतले उनको खोजी कार्य जारी राखेको छ ।

सोही क्रममा सिँहदरबार प्रहरी वृत गेट पाससँग सम्पर्क गर्दा गाडी लिएर फरार भएको बिषयमा अपडेट नभएको प्रतिक्रिया दिएको छ ।