महिनौपछि एक्सनमा आए कमला नगरपालिकाका मेयर यादव, शिक्षकहरुको आन्दोलन स्थगित

न्यूज ब्यूरो, जनकपुरधाम । पूर्वी धनुषाको कमला नगरपालिकामा आन्दोलनरत शिक्षक र कमला नगरपालिकाबीच सहमित भएको छ ।

चारदिनदेखि अनिश्चितकालिन धर्नामा बसेका नगरभित्रका शिक्षकहरु र नगरपालिका प्रशासनबीच सहमति भएपछि आन्दोलन स्थगित भएको हो ।

कमला नगरपालिकाका मेयर विशेश्वर प्रसाद यादव र उपमेयर शिला देवी मण्डलको विशेष सक्रियतामा भएको छलफलबाट आउँदो पुस १५ गतेभित्रै तलबभत्ता दिने सहमतिपछि शिक्षकहरुले धर्ना स्थगित गरेको हो ।

नगरपालिकाभरिको शिक्षकहरुले विगत ५ महिनादेखि तलब नपाएको भन्दै चरणबद्ध आन्दोलन गर्दै आएको थियो । यसअघि पनि पटक पटक माग पुरा गर्ने प्रतिवद्धता जनाएपनि समायानुकुल नहुँदा तलब भत्ता पाउन सकेका थिएनन् ।

आगामी पुस १५ गतेभित्रै नगरपालिकाको सबै प्रक्रिया पुरा गरी शिक्षकहरुको खातामा तलबभत्ता पुग्ने प्रतिबद्धता मेयर यादवले जनाएपछि धर्ना कार्यक्रम रोकिएको हो ।

नगर प्रमुख यादव, उपमेयर मण्डल र प्रमुख प्रशासकीय अधिकृत सुबोध कुमार ठाकुरको विशेष उपस्थितिमा शिक्षकहरुबीच सहमति भएको हो ।

कमला युवा सँजालका अध्यक्ष विमलेश यादवसहित अन्य कर्मचारी, शिक्षक अगुवा, समाजसेवीहरुको सँयुक्त छलफलबाट पुस १५ गतेभित्रै तलब भत्ता उपलब्ध गराउने भएको हो ।

सबै वडाको योजना पेश भएपनि प्रक्रियागत जाँदा कम्तीमा पनि दुई हप्तासम्म समय लाग्ने भएकोले खाता सँचालन र निकासा भएलगत्तै तलबभत्ता खातामा पुग्ने प्रतिवद्धता जनाइएको छ ।