शिक्षककै अभाव भएपछि सिरहाको औरही विद्यालयमा विद्यार्थीहरुले हाने ताला

न्यूज ब्यूरो, सिरहा । विद्यालयमा शिक्षकको अभाव भएको भन्दै सिरहास्थित एक समुदायिक विद्यालयमा तालाबन्दी गरिएको छ ।

सिरहाको औरही गाउँपालिका वडा नम्बर ५ औरहीस्थित रहेको सुन्दर जनता माध्यमिक विद्यालयका विद्यार्थीहरुले बुधबार बिहान तालाबन्दी गरेको छ ।

विद्यालयमा शिक्षकको अभावले विगत एक वर्ष देखि विद्यार्थीहरुको पठन पाठनमा कठिनाई हुन थालेपछि बाध्य भएर विद्यार्थीहरुले तालाबन्दी गरेको हो । उनीहरुले शिक्षकको खास माग गर्दै तालाबन्दी गर्न बाध्य भएको बताइएको छ ।

कक्षा १० को अन्तिम परीक्षा अर्थात एसईई परीक्षाका केही महिना मात्र बाँकी रहँदा पनि विद्यालयमा शिक्षकको अभावले कोर्स समेत पूरा नसकेको गुनासो विद्यार्थीहरु गरेका छन् । उनीहरुले कमै समयमा भएपनि कोर्स पूरा गर्न सकिए एसईई पास गर्न सजिलो हुने बताए ।

विद्यार्थीहरुले “विद्यार्थी माथि अत्याचार गर्न पाइँदैन, स्वास्थ्य विषयको शिक्षक व्यवस्था गर, सामाजिक बिषयको शिक्षक व्यवस्था गर, विद्यार्थीको माग पुरा गर, विद्यार्थीको भविष्यसँग खेलवाड गर्न पाइँदैन” जस्ता नारा लगाउँदै तालाबन्दी गरिदिएको हो ।

तालाबन्दीको विषयमा विद्यालयका प्रधानाध्यापक (हेडमास्टर) इन्द्रदेव यादवले गाउँपालिकाले विद्यालयबाट करार सेवाका शिक्षकहरुलाई हटाएपछि यो अवस्था सृजना भएको बताए ।

विद्यालयको पठन पाठनका लागि थप शिक्षक व्यवस्था गर्न नसकिएपछि विद्यार्थीहरु ताल्चा लगाएको र हामीले ताल्चा खोल्ने प्रयासमा लागेको बताए ।

गाउँपालिकको अध्यक्ष शिवजी यादवले विद्यालयमा तालाबन्दी बारे आफूलाइ कुनै जानकारी नभएको प्रतिक्रिया दिए । उनले विद्यालयमा तालाबन्दी किन र कसले गरेको बारे आफूभन्दा पनि विद्यालयका प्रधानाध्यापकलाई जानकारी हुनुपर्ने बताउँदै आफूलाई यसबारे अहिलेसम्म कुनै जानकारी नभएको बताए ।