नेपाल रेलमा टिकट नै चेक गर्दैन TTE, बिना टिकट यात्राले घाटामा रेल्वे

न्यूज ब्यूरो, जनकपुरधाम । नेपालको एक मात्र ऐतिहासिक रेल भनिएको जयनगर–जनकपुरधाम रेल्वे अहिले घाटामा चलिरहेको छ ।

नेपालमा सन् १९२७ मै पहिलो पटक रेल सेवा शुरू भएको भए पनि अहिले धनुषाको कुर्था देखि भारतको जयनगरसम्म ३५ किलोमिटर मात्र रेल सेवा अहिले घाटामा रहेको छ ।

पुरानो रेल सेवा समेत टिटिईको कारणले घाटामा गएर बन्द भएको इतिहास छ । रेल चढने यात्रुले अनिवार्य टिकट काटिनुपर्नेमा टिटिईले नियमित चेकजाँच नै नगर्दा बिना टिकटका यात्रा गरिरहेको देखिएको छ । यसले रेल्वे निरन्तर घाटामा गएको छ ।

देशभित्र दक्ष जनशक्ति नभएका कारण भारतबाट रेल चलाउनका लागि कर्मचारी ल्याइएको रेल सञ्चालन गर्ने नेपाल रेल्वे कम्पनीको कर्मचारीले समेत मनबमोजिम कार्य नगर्दा घाटा बेहोर्नु परेको छ ।

भारतीय कम्पनीलाई मासिक १ करोड ४३ लाख रुपैयाँ तिर्नु पर्ने रेल्वे कम्पनीको मासिक आम्दानी लगभग ६५ लाख मात्र छ।

दैनिक चल्ने रेल्वेको बोगी जहिले पनि खचाचख यात्रु भरेको हुन्छ । केही दुरीमा राखिएको हल्ट, स्टेशनमा चढने यात्रुहरुले अधिकांश टिकट नै किन्दैनन् । रेल भित्र टिकट चेक कहिलेकाही मात्र गर्ने गरेकोले टिकट नलिएरै रेल यात्रा गरिरहेको पाईएको छ ।

“जयनगर जाँदा म एक दिन मात्रै टिकट कटाएको थिए, अब कहिल्यै टिकट लिँदैन, टिटई चेक नै गर्दैन अनि किन लिनु टिकट ।” खजुरीबाट रेल चढने एक किशोर यात्रुले बताए ।

रेलमा खचाखच भरिएको यात्रुलाई नियमित चेकजाँच कडाईको साथ गरिए रेलले न्यून घाटा बेहोर्नुपर्नेछ । नेपाल रेल्वेका कर्मचारीहरु राजनीतिक नियुक्ति पाएका छन् । विभिन्न दलका नेता कार्यकर्ताहरुले पाएको नियुक्तिले अपेक्षाकृत कार्य हुन नसक्दा रेल घाटामा गएको छ ।