जनकपुरः जन्ती (बाराती) बोकेको विंगर दुर्घटना, पाँच जनाको मृत्यू

न्यूज ब्यूरो, जनकपुरधाम । मधेश प्रदेशको राजधानी जनकपुरधामस्थित बिहानै जन्ती (बाराती) बाकेको विंगर दुर्घटना हुँदा पाँच जनाको मृत्यू भएको छ ।

जनकपुरधामसँगै रहेको महोत्तरीको पिपरा गाउँपालिका गम्हरियाबाट जन्ती (बाराती) बोकेको जीप दुर्घटना भएको हो । सो दुर्घटनामा पाँचको मृत्यूसहित अन्य करिब डेढ दर्जन व्यक्ति घाईते भएका छन् ।

जन्ती बोकेको बा १ ज ८२९३ नम्बरको टाटा विंगर र ज १ च १४९६ नम्बरको पिकअप भ्यान धनुषाको वीरेन्द्रबजारमा एकआपसमा ठोकिएका हुन् ।

जन्ती सकाएर सुनसरी जिल्लाको इटहरीबाट फर्किँदै गर्दा शनिबार (आज) बिहान करिब ४ः४५ बजेको समयमा पूर्व–पश्चिम राजमार्ग अन्तर्गत धनुषा जिल्लाको बीरेन्द्रबजारस्थित सो विंगर दुर्घटनामा परेको जिल्ला प्रहरी कार्यालय धनुषाले जनाएको छ ।

धनुषाका प्रहरी प्रमुख (एसपी) बसन्त रजौरेका अनुसार, मृत्यु हुनेमा मुखियापट्टी मुसहरिनिया तुल्सियाहीकी ३५ वर्षीया रुवी साह, महोत्तरी पिपरा गाउँपालिका–२ का ११ वर्षीय एस कुमार साह, रामगोपालपुर नगरपालिका ससौलाका दुई दिदी–बहिनी १३ वर्षीया सृजन साह र १८ वर्षीया मञ्जु साह तथा सवारी चालक धनुषाको धनौजी गाउँपालिका वडा नम्बर ४ का २५ वर्षीय अब्दुल मन्सुर छन् ।

घाइतेहरुको प्रादेशिक अस्पताल धनुषामा उपचार भइरहेको छ भने अन्य एक महिलाको अवस्था गम्भीर रहेको अस्पतालले जनाएको छ ।