सप्तरी २ को प्रदेश साँसदमा जसपाको लज्जास्पद हार, जनमतले निकाल्यो विजयी जुलुस

न्यूज ब्यूरो, राजविराज । मधेश प्रदेशमा डा. सिके राउत नेतृत्वको जनमत पार्टीले खाता खोलेका छन् ।

सप्तरी जिल्लाको निर्वाचन क्षेत्र नम्बर २ (क) बाट प्रदेश साँसदको लागि जनमत पार्टीका सतिश कुमार सिँह विजयी हुँदै जनमतको पहिलो खाता खोलेका हुन् ।

सो क्षेत्रबाट उम्मेदवारी दिएका सतिश सिँहले कुल १४ हजार ३२२ मत ल्याएर जसपाका नेता शैलैन्द्र कुमार साहलाई भारी मतान्तरले पछाडी रहेका छन् । अधिकारिक घोषणा केही बेरमा हुँदैछ ।

यस्तै निर्वाचन क्षेत्र नं. २ (ख) बाट जनमतका महेश प्रसाद यादव जसपाका लक्ष्मण यादवलाई भारी मतान्तरले पराजित गरेको छ ।

जनमतका महेशले कुल १३ हजार ३२५ मत प्राप्त गरेका छन् भने जसपाको छाता छापबाट चुनाव लडेका लक्ष्मण यादवले कुल छ हजार ६ सय २१ मत मात्र ल्याउन सकेको हो ।

सो क्षेत्रका जनताहरुले अहिले दुवै क्षेत्रबाट विजयी उत्सवको तयारीसहित विजयी रयाली समेत निकालेको हो ।