धनुषा निर्वाचन क्षेत्र नं. ३ को मतगणना भर्खरै सुरु

न्यूज ब्यूरो, जनकपुरधाम । मँसिर ४ गते आईतबार सम्पन्न प्रतिनीधिसभा तथा प्रदेशसभाको मतगणना आज विहान ५ः३० बजेबाट सुरु भएको हो ।

धनुषाको निर्वाचन क्षेत्र नम्बर ३ को मतगणनाको लागि निर्वाचन अधिकृतको कार्यालयले विहान ४ बजेदेखि नै सुरु हुने भनिएपनि सर्वदलिय प्रतिनीधिहरु समयमा उपस्थित नहुँदा मतदान केही ढिला भएको हो ।

निर्वाचन अधिकृतको कार्यालय निर्वाचन क्षेत्र नम्बर ३ ले एक सूचना जारी गर्दै सोमबार (आज) विहान ४ बजेदेखि मतगणना हुने जनाएको छ ।

यता, अन्य क्षेत्रहरुको भने विहान ८ बजेदेखि मात्र मतगणना सुरु हुने बताईएको छ । निर्वाचन क्षेत्र नम्बर ३ को मतगणना नीधि भवन जनकपुरधाममा भईरहेको छ ।

जिल्लाको क्षेत्र नम्बर–१ को धनुषाधाममा, क्षेत्र नम्बर–२ को तिनकौरियामा र क्षेत्र नम्बर–४ को महेन्द्रनगरमा मतगणना हुने मुख्य निर्वाचन अधिकृत ब्रजेश प्याकुरेलले जानकारी दिए ।

उनले सबै मतगणनास्थलहरूमा सुरक्षाका लागि तारजाली र सीसीटिभी क्यामरा जडान गरिएको बताए ।

आइतबार सम्पन्न निर्वाचनमा धनुषामा ६२ प्रतिशत मत खसेको छ ।

प्रतिनिधिसभा तर्फ धनुषाको निर्वाचन क्षेत्र नम्बर–१ मा २५, क्षेत्र नम्बर–२ मा १६, क्षेत्र नम्बर–३ मा ३१ र क्षेत्र नम्बर–४ मा ३१ जना उम्मेदवार छन् भने प्रदेशसभा १ को (क) मा १४, (ख) मा १४ र २ को (क) मा १४ तथा (ख) मा १७ जना उम्मेदवार छन् । त्यस्तै, ३ को (क) मा २० र (ख) मा २७ तथा ४ को (क) मा १९ र (ख) मा १३ जना उम्मेदवार छन् ।