भोलीदेखि ४ दिनसम्म जनकपुर–जयनगर रेल सेवा बन्द

न्यूज ब्यूरो, जनकपुरधाम । नेपालको एक मात्र रेल सेवा जयनगर–जनकपुरधाम रेल सेवा भोलीदेखि केही दिनको लागि नचल्ने भएको छ ।

छिमेकी राष्ट्र भारतको जयनगरदेखि मधेश प्रदेशको राजधानी जनकपुरधामसम्म सँचालनमा रहेको वैकल्पिक यातायातको साधन रेल विहिबारदेखि मँसिर ४ गते निर्वाचन दिनसम्म नचल्ने बताइएको छ ।

नेपाल रेल्वे कम्पनी लिमिटेड जनकपुरले बुधबार एक सूचना जारी गर्दै ३ दिनको लागि सीमा सिल हुने भएपछि सीमापारीसम्म चल्ने गरेको रेल सेवा समेत स्थगित गरिने भएको छ ।

सीमा पार गरी रेल सेवा चल्दै आएकोमा मँसिर ४ गते हुन लागेको प्रतिनीधिसभा तथा प्रदेशसभा सदस्य चुनावलाई मध्यनजर गरी दुवै देशका अधिकारीहरुको निर्णय अनुसार सीमा बन्द रहने जनाएको छ ।

चुनावको दिउँसो ४ बजेसम्म कुनै पनि रेल नचल्ने जनाईएको छ । चुनावको भोलिपल्ट मँसिर ५ गतेदेखि पुनः साबिककै समयमा रेल सँचालन हुने महाप्रबन्धक निरन्जन झाले जानकारी दिए ।