यसपालीको विवाहपँचमीमा ६० हजार जन्ती (बाराती) लिएर जनकपुर आउँदै सतपालजी महाराज

न्यूज ब्यूरो, जनकपुरधाम । हरेक वर्ष धुमधामको साथ मनाइने राजजानकी विवाह महोत्सव “विवाहपँचमी महोत्सव” मा यसपाली भारतबाट हजारौँको सँख्यामा जन्ती (बाराती) आउने लगभग पक्का भएको छ ।

मधेश प्रदेशको राजधानी एवम् धार्मिक नगरी भनेर चिनिने जनकपुरधाममा आगामी मँसिर १२ गते आयोजना हुने विवाहपँचमी महोत्सवको लागि छिमेकी मुलुक भारतबाट ६० हजार श्रद्धालुको जन्ती लिएर सतपालजी महाराज जनकपुर आउन लागेको बताईएको छ ।

हरेक वर्ष विवाह पञ्चमीमा जनकपुरधाममा आयोजना हुँदै आएको रामजानकी विवाह महोत्सवमा यसवर्ष भारतको उत्तराखण्ड प्रदेशका पर्यटनमन्त्री तथा अन्तर्राष्ट्रिय आध्यात्मिक गुरु सतपालजी महाराज प्रमुख अतिथि हुने भएका छन् ।

बृहत्तर जनकपुर क्षेत्र विकास परिषद्का अध्यक्ष शितल साहले धार्मिक गुरु महाराजको नेतृत्वमा ६० हजार जन्ती जनकपुर आउन लागेका जानकारी दिए ।

‘उहाँ धार्मिक व्यक्तित्व हुनुहुन्छ र पहिला पनि प्रवचनमा जनकपुर आउनुभएको हो,’ अध्यक्ष साहले भने, ‘उहाँको नेतृत्वमा हालसम्मकै सबैभन्दा धेरै ६० हजार जन्ती आउँदै हुनुहुन्छ, अहिलेसम्म यतिधेरै जन्ती आएका थिएनन् ।’ विवाह पञ्चमीको अवसरमा भगवान् रामको जन्मभूमि भारतको अयोध्याबाट जानकीको जन्मभूमि जनकपुरधाममा जन्ती ल्याउने परम्परा छ ।

यसअघि प्रमुख अतिथिका रूपमा भारतका प्रधानमन्त्री नरेन्द्र मोदी र उत्तर प्रदेशका मुख्यमन्त्री योगी आदित्यनाथ रामजानकी विवाह महोत्सवमा सहभागी भएका थिए ।

भारतीय जनता पार्टी (भाजपा) का राष्ट्रिय कार्यकारिणी सदस्य समेत रहेका सतपालजी महाराज भारतका प्रभावशाली नेतामध्ये पर्छन् । उनी मानव धर्मका प्रणेता पनि हुन् ।

जानकी मन्दिर जनकपुरधाका महन्त रामतपेश्वर दास वैष्णवको निम्तोमा प्रमुख अतिथिको रूपमा महाराज आउने उनका सहयोगी नबिन कोइरालाले जानकारी दिए ।

मंसिर ७ गतेबाट प्रारम्भ हुने सप्ताहव्यापी विवाह महोत्सव कार्यक्रममा सतपालजी महाराज मंसिर ११ र १२ गतेको समारोहमा सरिक हुने जानकी मन्दिरका उत्तराधिकारी महन्त रामरोशन दास वैष्णवले जानकारी दिए ।

विवाहपँचमी महोत्सवमा प्रत्येक वर्ष हजारौँको सँख्यामा श्रद्धालुहरु जनकपुरधाम आउने गर्दछन् । त्रेता युगमा राम र सीताको विवाह भएको स्मरणमा प्रत्येक वर्ष जनकपुरधाम जानकी मन्दिरमा विवाहपँचमी महोत्सव मनाइने गरिन्छ ।