भोलीदेखि धनुषा जिल्लाभरि दारु बेच्न र खान निषेध

न्यूज ब्यूरो, जनकपुरधाम । जिल्ला प्रशासन कार्यालय धनुषाले भोली शनिबारदेखि लागू हुने गरी धनुषा जिल्लाभरि दारु (मदिरा) विक्री वितरण र सेवन गर्न निषेध गर्ने भएको छ ।

जिल्ला प्रशासन कार्यालय धनुषाले शुक्रबार एक सूचना जारी गर्दै आगामी मँसिर ४ गते हुन लागेको प्रतिनीधिसभा तथा प्रदेशसभा सदस्य निर्वाचनलाई स्वच्छ बनाउको लागि एक सातासम्म मदिरा विक्री वितरण र सेवनमा समेत निषेध गरिएको हो ।

धनुषाका सहायक प्रमुख जिल्ला अधिकारी अनुज भण्डारीद्धारा जारी गरिएको सो सूचनामा निर्वाचनलाई सुरक्षित, भयरहित, स्वच्छ र निष्पक्ष बनाउनको लागि निर्वाचन सुरक्षा व्यवस्थापन निर्देशिका बमोजिम भोली शनिबारदेखि निर्वाचन सम्पन्न नहुन्जेलसम्म विक्री वितरण तथा सेवन नगर्न सूचना जारी गरिएको हो ।

निर्देशिकाको दफा ६ को (थ) मा भएको व्यवस्था अनुसार सर्वदलिय बैठकबाट जिल्लाभरि यस्ता क्रियाकलाप गर्न निषेध गरिएको सूचनामा उल्लेख गरिएको छ ।

जिल्ला प्रशासन कार्यालयको सूचना बरखिलाफ गरिए वा उलंघन गरिए प्रचलित कानुन बमोजिम कारवाहीको चेतावनी समेत प्रशासनले दिएको हो ।