कमला स्नानको लागि जनकपुर–जयनगर रेल दुईदिनसम्म समय बाहेक पनि चल्ने

न्यूज ब्यूरो, जनकपुरधाम । आउँदो कार्तिक २२ गते परेको कार्तिक पूर्णिमामा कमला स्नानको लागि यात्रुहरुलाई मध्यनजर गरी जयनगर जनकपुर रेल्वे थप ट्रिप चलाउने भएको छ ।

नेपाल रेल्वे कम्पनी केन्द्रीय कार्यालय जनकपुरधामले शनिबार एक सूचना जारी गर्दै कार्तिक पूर्णिमा र कमला स्नानलाई ध्यानमा राखी यात्रुहरुको सहजताको लागि समय बाहेक पनि रेल चलाउने भएको छ ।

प्रत्येक दिन दुई सिफ्ट चल्ने नेपाल रेल्वेले कमला स्नानको लागि हजारौँको सँख्यामा यात्रुहरु कमला नदी जाने भएपछि दोस्रो सिफ्टपछि थप सिफ्ट सँचालन गर्ने जनाएको छ ।

अहिले ४ देखि ५ वटा बोगीसम्म बोक्ने नेपाल रेल्वेले भूतमेलाको लागि बोगी समेत थप्ने बुझिएको छ ।

प्रत्येक बर्ष कमला नदीमा भूतमेला लाग्ने गरिन्छ । कार्तिक पूर्णिमा स्नानको लागि विभिन्न जिल्लाहरुबाट धनुषा र सिरहा जोडने धार्मिक आस्था बोकेको पवित्र कमला नदी स्नान गर्ने गरिन्छ ।

कमला नदीमा प्रत्येक वर्ष कार्तिक पूर्णिमाको दिन भव्य मेला समेत लाग्ने गरेको छ ।