जनकपुरका यी दुई वडाध्यक्षबीच कुटाकुट, एक अस्पताल भर्ना

न्यूज ब्यूरो, जनकपुरधाम । जनकपुरधाम उपमहानगरपालिकाका दुई वडाध्यक्षबीच कुटाकुट भएको छ ।

जनकपुरधाम उपमहानगरपालिका वडा नम्बर ८ का वडाध्यक्ष दिनेश सिंहले वडा नम्बर ५ का वडाध्यक्ष बेचन साहमाथि कुटपिट गरेको आरोप लगाइएको छ ।

सिंहले नेकपा एमालेको जनकपुरधामस्थित क्षेत्रीय कार्यालयमा वडाध्यक्ष साहमाथि कुटपिट गरेको आरोप लगाइएको हो ।

मंगलबार नेकपा एमालेको तर्फबाट गत स्थानीय तहको निर्वाचनमा जनकपुरधामको १५ वटा वडामा वडाध्यक्ष पदमा उम्मेदवारी दिएका सम्पूर्ण उम्मेदवारहरूसँग आयोजित चुनावी छलफलमा खानपिनको विषयमा विवाद हुँदा कुटपिट भएको बताइएको छ ।

वडा नम्बर ८ का वडाध्यक्ष दिनेश सिंह र वडा नम्बर १ का एमालेका वडाध्यक्ष पदका प्रत्यासी रहेका लव अधिकारीले एमालेबाटै निर्वाचित वडा नम्बर ५ का वडाध्यक्ष बेचन साहलाई कुटपिट गरेका छन् ।

एमालेको जनकपुरधामस्थित क्षेत्रीय कार्यालयमा आगामी प्रतिनिधि तथा प्रदेशसभा सदस्यको निर्वाचनमा पार्टीका उम्मेदवारहरूलाई जिताउनका लागि आयोजित बैठकपश्चात आयोजित खानपिनको क्रममा सामान्य विवाद भएको थियो ।

सोही क्रममा वडाध्यक्ष सिंहले लवलाई निर्देशन दिँदै अर्का वडाध्यक्ष साहमाथि एक्कासी हातपात गर्न लगाएका आरोप लागेको छ ।

घाइते वडाध्यक्ष साहलाई शरीरको विभिन्न भागमा गम्भीर चोट लागेको छ । उनको अहिले प्रादेशिक अस्पताल जनकपुरधाममा उपचार भइरहेको छ ।

यस सम्बन्धमा बुझ्नका लागि वडाध्यक्ष सिंहलाई पटकपटक फोन गरेपनि उनले फोन रिसिभ गरेनन् ।