कमला नगरपालिकाका मेयर यादवविरुद्ध शिक्षकहरु आन्दोलनमा, तालाबन्दीको चेतावनी

न्यूज ब्यूरो, जनकपुरधाम । पूर्वी धनुषाको कमला नगरपालिकाका नगर प्रमुख विशेश्वर यादव विरुद्ध नगरका शिक्षकहरु आन्दोलित भएका छन् ।

चालु आर्थिक बर्षमा अहिलेसम्म एउटा पनि तलबभत्ता नदिएको भन्दै मेयर विरुद्ध शिक्षकहरु आन्दोलित भएका छन् ।

कमला नगरपालिका वडा नम्बर २ स्थित नेपाल राष्ट्रिय शिक्षक सँगठनका कार्यवाहक जिल्ला अध्यक्ष मन्जु महतोको अध्यक्षतामा बसेको नगरभरिको शिक्षकहरुको बैठकले मेयर यादव, प्रमुख प्रशासकीय अधिकृत सुबोध कुमार ठाकुर र लेखापाल सँजीव कुमार महतोलाई तलब भुक्तानी किन नभएको बारे सोधपुछ गर्ने कार्यक्रम तय गरेको हो ।

उनीहरुले नगरपालिकाका कर्मचारीहरु नआउँदा आफूहरुले डेलिगेशन समेत बुझाउन नसकेको गुनासो पोखे । शिक्षकहरुले मेयर यादव एक आध दिन मात्र नगरपालिका आउने गर्दा थप जटिलता भएको सुनाए ।

कार्तिक महिनाको पहिलो सातासम्म तलब भत्ताको लागि पहल नगरिए थप आन्दोलनका कार्यक्रम सार्वजनिक गरिने जनाएको छ । उनीहरुले आफूहरुको माग सम्बोधन नभए बाध्य भएर तालाबन्दी गर्ने चेतावनी समेत दिएका हुन् ।

बैठकमा शिक्षक रोहित यादव, रामभगत यादव, जीतेन्द्र पासवान, जगरनाथ यादव, उमेश कुमार यादव, बासुदेव यादव,सुरेन्द्र यादव, मोताी यादव, अरुण चौधरी, अशोक कुमार मण्डल, लक्ष्मी पासवान, कविता कुमारी यादव, राम कैलाश यादव, ममता कुमारी यादव, आशा कुमारी यादव, लक्ष्मी यादव, शुभनारायण महरा लगायत दुई दर्जन बढी शिक्षकहरुको उपस्थिति रहेको थियो ।

कमला नगरपालिकामा मेयर यादव र उपमेयर शिला देवी मण्डलको हठ्ठले नगरपालिका अझै सँचालन हुन सकेको छैनन् ।