जनकपुरः शहिदगेटमा लगाइएको जसपाको झण्डा उखालेर फालियो

न्यूज ब्यूरो, जनकपुरधाम । जनकपुरधामस्थित रहेको शहिदगेट लगाइएको जनता समाजवादी पार्टी (जसपा) नेपालको झण्डा पुनः उखेलेर फालिएको छ ।

बुधबार जसपाका कार्यकर्ताहरुले शहिदगेटमा लगाएको जसपाको झण्डा रातीमै युवाहरुले उखेलेर फालिदिएको हो । सो स्थानमा नेपालको झण्डा फहराइएको छ ।

जसपाका युवा नेता नविन कुमार यादवको नेतृत्वमा गएको जसपाका कार्यकर्ताहरुको टोलीले शहिदद्धारमा निर्माण गरिएको शहिदहरुको प्रतीमामा राजनीतिक दल जसपाको झण्डा फहराइएको थियो ।

जसपाको झण्डा फहराइएको केही घण्टामै युवाहरु पुगेर सो स्थानबाट पार्टीको झण्डा उखेलेर फालिदिएको छ । शहिद कुनै पार्टीको नभएको भन्दै पार्टीको झण्डा उखेलेर फालिदिएको हो ।

बुधबार जसपाका कार्यकर्ताहरुले शहिदगेटबाट जसपाको झण्डा फाल्नेलाई भौतिक कारवाही गर्ने चेतावनी दिएको केही घण्टामै जसपाको झण्डा उखेलेर फालिदिएको हो ।

शहिद कुनै पनि राजनीतिक दलको नरहेको बताउँदै युवाहरुले शहिदगेटमा नेपालको झण्डा बाहेक अन्य कुनै झण्डा राख्न नहुने भन्दै झण्डा उखेलेर फालिदिएको हो ।

तेस्रो मधेश आन्दोलनको क्रममा २०७२ साल भदौ २५ गते प्रहरीको गोली लागेर सहिद भएका धनुषाका नितु यादव, दिलिप यादव र सँजय कुमार चौधरीको प्रतिमा राखिएको सो शहिदद्धारमा जसपाले झण्डा लगाएका थिए ।

गत भदौ २५ गते राखिएको बलिदानी दिवसको अवसरमा जसपाले आफ्नो पार्टीको झण्डा लगाएपछि जनकपुरका युवा कुलदिप साहले सो झण्डा हटाएर नेपालको झण्डा फहराएका थिए ।

बुधबार अपरान्ह जसपाका कार्यकर्ताहरुले सो ठाउँमा पुनः जसपाको झण्डा लगाउँदै झण्डा हटाउनेलाई भौतिक कारवाहीको चेतावनी दिएका थिए । तर, केही घण्टामै सो झण्डा उलेखेर फालिएको हो ।

सो क्रममा केही दिन अगाडी जसपाको झण्डा हटाएका कुलदिप साहले ५ बर्ष अगाडी जनकपुरको राराब कलेजको मुख्यद्धारमा झुण्डयाइएको नेपाली काँग्रेसको झण्डा हटाउने आफू नै रहेको बताएका छन् ।

उनले सार्वजनिक स्थलमा कुनै पार्टीको झण्डा अशोभनीय भएको भन्दै आफू यसको लागि सदैव अग्रसर भएको बताए । उनले राराबको द्धारबाट नेपाली काँग्रेसको झण्डा हटाउँदा विभिन्न धाकधम्की आउँदा आफू नडराएको पनि दाबी गरे ।