अब नगरपालिकामै राष्ट्रिय परिचय पत्र बन्ने, लाईन लाग्ने झन्झटबाट मुक्ति

न्यूज ब्यूरो, जनकपुरधाम । जिल्ला प्रशासन कार्यालयमा बन्दै आएको राष्ट्रिय परिचय पत्र अब पालिकाबाटै बन्ने भएको छ ।

मधेश प्रदेशस्थित जिल्ला प्रशासन कार्यालय सिरहाले एक सूचना जारी गर्दै आगामी महिनाको २ गतेदेखि पालिकास्तरमै राष्ट्रिय परिचय पत्र बन्ने भएको जनाएको छ ।

बुधबार जारी गरिएको सूचनामामा सिरहा जिल्लाको १७ वटै स्थानीय तहमा राष्ट्रिय परिचय पत्रको लागि स्टेशन खडा गरी राष्ट्रिय परिचय पत्रको कार्य अगाडी बढाउने जनाएको छ ।

राष्ट्रिय परिचय पत्र तथा पञ्जिकरण विभागलाई उदृत गर्दै जिल्ला प्रशासन कार्यालयमा हुने भिडभाडलाई मध्यनजर गरी सम्बन्धित स्थानीय तहमै यसको व्यवस्था मिलाउने भनिएको छ ।

असोज ०२ गतेदेखि सम्बन्धित स्थानीय तहको सेवाग्राहीहरुले सम्बन्धित स्थानीय तह (नगरपालिका, गाउँपालिका) मै गएर राष्ट्रिय परिचय पत्रको कार्य गराउन अनुरोध गरिएको छ ।

सिरहाका प्रमुख जिल्ला अधिकारी लालबाबु कवारीले जारी गरेको सूचनामा राष्ट्रिय परिचय पत्र बनाउन बाँकी रहेका सेवाग्राहीले असोज ०२ गतेदेखि आफ्नै नगरपालिका, गाउँपालिकामा गएर कार्य गराउन अनुरोध गरिएको हो ।