जनकपुरमा ओलीलाई झण्डा देखाउने करिब १ दर्जन युवक पक्राउ

न्यूज ब्यूरो, जनकपुरधाम । नेकपा एमालेका अध्यक्ष केपी शर्मा ओलीलाई जनकपुरधाममा कालो झण्डा देखाउने करिब एक दर्जन युवकलाई प्रहरीले पक्राउ गरेको छ ।

आईतबार जनकपुरधाममा एमालेले आयोजना गरेको वृहत पार्टी प्रवेश कार्यक्रममा सहभागी हुन जनकपुरधाम आउँदा विमानस्थलमा कालो झण्डा देखाउने युवाहरुलाई प्रहरीले पक्राउ गरेको हो
।

उनीहरूलाई जनकपुरधाम विमानस्थल अगाडिबाट ११ जनालाई पक्राउ गरिएको धनुषाका प्रहरी प्रमुख प्रहरी उपरीक्षक वसन्त रजौरेले बताए ।

ओलीलाई कालो झण्डा देखाउन खोजेको सूचनाका आधारमा उनीहरू पक्राउ परेको एसपी रजौरेले बताए । कालो झण्डा बोकेर बसेकाहरूलाई नियन्त्रणमा लिइएको उनले जानकारी दिए । उनीहरूलाई नियन्त्रणमा लिए पनि नाम भने खुलाइएको छैन ।

नेकपा एमालेको विरोधका बीच नागरिकता विधेयक प्रमाणीकरणमा ढिलाइ भइरहेको आरोप लगाउँदै युवाहरूले अध्यक्ष ओलीलाई कालो झण्डा देखाउन खोजेका थिए ।