सिरहा: बालिका बलात्कार आरोपमा एक युवक पक्राउ

न्यूज ब्यूरो, सिरहा । सिरहा प्रहरीले बालिका बलात्कार आरोपमा एक युवकलाई नियन्त्रणमा लिएको छ।

विवाह गर्ने प्रलोभनमा पारी १४ वर्षीया बालिकालाई बलात्कार गरेको आरोपमा गोलबजार नगरपालिका वडा नम्बर ७ का जुमन खानलाई पक्राउ गरेको हो।

गोलबजार नगरपालिका ६ मा डेरा लिएर बस्दै आएको खानले बालिकालाई विवाह गर्ने प्रलोभन देखाई गत २०७८ चैते १० गते रातभरि पटकपटक बलात्कार गरेर फरार रहेका खानलाई इलाका प्रहरी कार्यालय गोलबजारले आफन्तकोमा लुकिछिपी रहेको अवस्थामा बुधबार मिर्चैयाबाट पक्राउ गरेको जनाएको छ।

घटनाको तत्काल उजुरी परे पनि स्थानीय जनप्रतिनिधिहरूका संरक्षणमा खान लुकिछिपी बस्दै आएको बुझिएको छ। उनीहरूले दुवैजनालाई विवाह गराएर घटना मिलाउन खोजेको स्रोतले जनाएको छ।

उनीहरु बिच विवाह हुन लागेको छ; तत्काल पक्राउ नगर्न प्रहरीलाई जनप्रतिनिधिहरूले नै दवाव दिँदै आएको बताइएको छ।

प्रहरीले भने घटनाको बारेमा थाहा पाए लगतै बालिकाको सबै जाँच भएको र करणी भएको देखिएकाले मुद्दा समेत दर्ता भइसकेको जनाए।

अदालतको पक्राउ पुर्जीअनुसार खानलाई नियन्त्रणमा लिएको इलाका प्रहरी कार्यालय गोलबजारका इन्स्पेक्टर राजु केसीले जानकारी दिए।

मुलुकी अपराध संहिता, २०७४ को ‘परिच्छेद –१८ करणी सम्बन्धी कसूर २१९. (२) मा कसैले कुनै महिलालाई निजको मन्जुरी नलिई करणी गरेमा वा मन्जुरी लिएर भए पनि अठार वर्षभन्दा कम उमेरको कुनै बालिकालाई करणी गरेमा निजले त्यस्तो महिला वा बालिकालाई जबर्जस्ती करणी गरेको मानिनेछ; भन्ने उल्लेख गरेको छ।

कानुनले १८ वर्ष मुनिका बालिकालाई मन्जुरीमा करणी गरेपनि अपराध ठहर गरेपनि स्थानीय प्रतिनिधिहरूले यसको अझै वेवास्ता गर्दै मिलापत्र वा विवाह गराउने नाममा घटनालाई सामसुम पार्न कोसिस गर्दै गर्दा यो घटना बाहिरिएको छ ।