काठ तस्करलाई बाटोबाटै भगाउने तीन कर्मचारी नोकरीबाट निलम्बित, हाकिमलाई उन्मुक्ति

न्यूज ब्यूरो, सिरहा । जिल्ला वन डिभिजन कार्यालय सिरहाका तीन जना कर्मचारी निलम्बनमा परेका छन् ।

अवैध काठसहित पक्राउ परेका गोलबजार नगरपालिका ९ घुर्मी बजारस्थित सञ्चालित लक्ष्मीनारायण स–मिलका सञ्चालक मदन ठाकुरलाई बाटोबाटै भगाएको घटनामा तीन जना कर्मचारी निलम्बनमा परेका हुन् ।

निलम्बनमा पर्नेमा सशस्त्र वन रक्षक रामवृक्ष मोची, जमदार ब्रहमदेव यादव र रामकुमार चौधरी छन् ।

उनीहरुलाई दुई महिनाका लागि निलम्बन गरिएको सिरहाका प्रमुख जिल्ला अधिकारी लालबाबु कवारीले बताए । उनीहरुमाथि कानुनी कारवाहीसमेत अघि बढाइएको उनले जनाए ।

मिर्चैया नगरपालिका–९ कमलदहमा रहेको समुदायक घुर्मी डाँडा वनको नर्सरीबाट अवैध रुपमा खयर र सिसौ जातका रूख कटान गरिएको पाइएपछि स्थानीयले खोज्ने क्रममा शुक्रबार उक्त मिलमा ६७ थान खयरको काठ बरामद गरेको थियो । त्यस लगत्तै स्थानीयले वनका कर्मचारीलाई खबर गरेका थिए ।

तर, नजिकै रहेको सब–डिभिजन वन कार्यालय चोहर्वा र सब–डिभजन वन कार्यालय मिर्चैया र लहानबाट जिल्ला वन कार्यालयका कर्मचारी ४ घण्टापछि मात्रै मिलमा आएका थिए ।

उनीहरूले बरामद काठसहित मिलका सञ्चालक मदन ठाकुरलाई पक्राउ गरेर लहान तर्फ लागेका थिए ।

तर, शनिबार स्थानीय अगुवाहरुले डीएफओ शैलेन्द्र मिश्रसँग यस विषयमा सोधखोज गरेपछि उनले मदन बीच बाटोबाटै भागेको जवाफ दिएका थिए ।

वनका कर्मचारीले मदनलाई मिलबाट पक्राउ गरेर लगेपनि हिरासतमा भने मिलका कामदार श्रवण ठाकुरलाई राखिएको छ ।

वनका कर्मचारीले मिलका सञ्चालकलाई भगाउनु र स्थानीयले बारम्बार फोन गरे पनि ४ घण्टापछि मात्रै मिलमा आउनुले यसमा वनकै कर्मचारीको मिलेमतो रहेको आरोप लगाएका छन् ।