उपमेयरको सरकारी गाडीले ठक्कर दिँदा दुई जना घाईते, एकको अवस्था सख्त

न्यूज ब्यूरो, जनकपुरधाम । मधेश प्रदेशको राजधानी जनकपुरधाम क्षेत्रस्थित एक पालिकाको स्थानीय सरकारको उपमेयरको सरकारी गाडीले ठक्कर दिँदा दुई जना घाईते भएका छन् ।

धनुषाको औरही गाउँपालिका वडा नम्बर २ कपटौलस्थित धनुषाको विदेह नगरपालिकाका उपमेयर आशा देवी झाको प्रदेश २ ०२ ००१ झ ००४२ नम्बरको सरकारी गाडीले अपरान्ह ७ः३० बजेको समयमा ठक्कर दिएको हो ।

हुलाकी सडकखण्ड अन्तर्गत औरही गाउँपालिका वडा नं. २ कपटौलस्थित जनकपुरबाट विदेह नगरपालिका तर्फ जाँदै गरेको झाको गाडीले विपरित दिशातर्फबाट आउँदै गरेको मोटरसाईकललाई ठक्कर दिएको थियो ।

उपमेयरका सवारी चालक अलि हुसैनले सवारी चलाउँदै थियो । तीन जना सवारी मोटरसाईकललाई ठक्कर दिएपछि एक जनाको अवस्था गम्भिर रहेको छ भने भने अर्काको अवस्था मध्यम रहेको छ ।

घाईतेहरुको नाम अझै खुलेको छैनन् भने उनीहरुलाई उपमेयरकै गाडीमा राखेर उपचारको लागि प्रादेशिक अस्पताल जनकपुरधाम ल्याइएको जिल्ला प्रहरी कार्यालय धनुषाका डिएसपी प्रदीप बहादुर क्षेत्रीले जानकारी दिएका छन् ।

अहिले उपमेयरको गाडी र गाडी चालक प्रहरीको नियन्त्रणमा रहेको प्रहरीले जनाएको छ । युवकहरु पोखैरभिडाको रहेको अपुष्ट जानकारी प्राप्त भएको छ ।

एक जना युवकको हातको औला कटेको जानकारी प्राप्त भएको छ । दुवै जनाको उपचार अस्पतालमा भईरहेको छ ।