जनकपुरको भू–माफिया भनिने अमर पँजीयार बालिकासहित बोर्डरमै पक्राउ

न्यूज ब्यूरो, जनकपुरधाम । जनकपुरधाममा चर्चामा रहँदै आएका रियल स्टेट बिजनेश एवम् भू–माफिया समेत भन्दै आएका जनकपुरका अमर पँजीयार एक बालिकासहित पक्राउ परेका छन् ।

जनकपुरधाम उपमहानगरपालिका वडा नं. १६ बस्ने अमर पँजीयारलाई नेपालको जटही बोर्डरबाटै पक्राउ गरिएको हो । भारतीय एसएसबीले ले उनीसहित अन्य एक जनालाई पक्राउ गरेको हो ।

लोकतान्त्रिक समाजवादी पार्टी (लोसपा) नेपालमा नेता समेत रहेका अमर पँजीयारले भारतबाट एक बालिकालाई ल्याउँदै गर्दा बोर्डरमा पक्राउ परेका हुन् ।

उनीहरुलाई भारत–नेपाल सीमामा तैनाथ ४८ औँ बटालियन जयनगर एसएसबी बोर्डर अन्तर्गत पिपरौन क्याम्पका जवानहरुले जटही बोर्डरबाट पक्राउ गरेका हुन् ।

बा २१ च ७१२८ नम्बरको चारपांग्रे गाडीमा सवार भई ८ वर्षीया एक बालिकालाई भारतबाट नेपालतर्फ ल्याइरहेको अवस्थामा शुक्रबार राति उनीहरुलाई प्रहरीले नियन्त्रणमा लिएको बताइएको छ ।

उनीहरुमाथि शंका लागेर चेकजाँच गर्दा पक्राउ गरिएको र नाबालिकलाई हरलाखी थाना प्रहरीको जिम्मा लगाइएको छ ।

उनीहरुले ती बालिकालाई काम गराउनका लागि बाँसोपट्टीबाट आफ्नो घर लगिरहेको चाइल्डलाइन सबसेन्टर जयनगरकी सबिता देवीले बताइन् ।

उनले ती बालिकाले आफूलाई बँधुवा मजदुरीका लागि उनीहरुले भारततर्फ लगिरहेको कुरा जानकारी दिएको बताइन् । उनले यो मानव तस्करीको मामिला रहेको दाबी गरिन् ।

नाबालिकलाई काम गराउनु दण्डनीय अपराध रहेकोले उनीहरुलाई सोही कानुनको अधिनमा रही पक्राउ गरिएको र थप कारबाहीका लागि भारतीय प्रहरीको नियन्त्रणमा राखिएको छ ।

उनीहरुले पीडितलाई कामको प्रलोभनमा पारेर नेपाल ल्याउन लागेको प्रहरी अनुसन्धानका क्रममा खुलेको छ । घटनाबारे प्रहरीले थप अनुसन्धान थालेको बताइएको छ ।