'रामरोशन दास' नै जानकी मन्दिरको उत्तराधिकारी महन्थः गुठी सँस्थान

न्यूज ब्यूरो, जनकपुरधाम । जानकी मन्दिरको उत्तराधिकारी महन्थको फर्जी परिचय पत्र बनाएको आरोप लागेका रामरोशन दास वैष्णव नै जानकी मन्दिरको उत्तराधिकारी महन्थ रहेको पाइएको छ ।

जानकी मन्दिरको उत्तराधिकार महन्थ र उत्तराधिकारी महन्थको फर्जी परिचय पत्र बनाएको विषयमा विवाद बढ्दै जान थालेपछि रामरोशन दास वैष्णव नै जानकी मन्दिरको उत्तराधिकारी महन्थ रहेको गुठी संस्थानले स्पष्ट पारेको छ ।

गुठी संस्थान जनकपुरधामका प्रमुख बैकुण्ठ रेग्मीका अनुसार गुठी संस्थानले नै उनलाई जानकी मन्दिरको उत्तराधिकारी महन्थमा नियुक्त गरेको हो ।

उनले भने ‘रामरोशनजी ले उत्तराधिकारी महन्थको फर्जी परिचय पत्र बनाएको आरोप निराधार हो, उनलाई २०७८ सालमै गुठी संस्थानको संचालक समितिको बैठकबाट निर्णय गरेर उत्तराधिकारी महन्थमा रामरोशन दास वैष्णवलाई नियुक्त गरिएको थियो ।’

गुठी संस्थानको संचालक समितिको २०७८ वैशाख १५ गते बसेको बैठकबाट उनलाई उत्तराधिकारी महन्थमा नियुक्त गरिएको थियो ।

सो बैठकको निर्णय अनुसार पुजारी लगायत जनशक्ति व्यवस्थापन निर्देशिका २०७७को दफा १०को उपदफा २मा उत्तराधिकारी महन्थ हुन तोकिएको सोही निर्देशिकाको दफा ८ बमोजिम योग्य भएको देखिएकाले उक्त निर्देशिकाको दफा १०को उपदफा १ र २ अनुसार रामरोशनलाई उत्तराधिकारी महन्थमा नियुक्त गरिएको पत्रमा उल्लेख छ ।

मन्दिरको उत्तराधिकारी महन्थ नियुक्त गर्ने अधिकार महन्थको अधिकारको विषय हुन्छ । यसका साथै महन्थले बनाएको आफ्नो ज्येष्ठ चेलालाई नै उत्तराधिकारी महन्थ बनाउने परम्परा रहँदै आएको छ ।

सोही अनुरुप जानकी मन्दिरका महन्थ रामतपेश्वर दास वैष्णवले केही वर्ष अगाडीदेखि नै रामरोशनलाई आफ्नो ज्येष्ठ चेलाको रुपमा परिचय गराउँदै आई रहेका थिए । महन्थले नै ज्येष्ठ चेलाको रुपमा नाता प्रमाणित गराएर उत्तराधिकारी महन्थ बनाई दिनका लागि गुठी संस्थानमा सिफारिश गरेका थिए ।

जानकी मन्दिरमा हुँदै आएको विवाहपञ्चमी महोत्सवको भव्य आयोजनमा हुने खर्चको विषयमा दुई वर्ष अगाडी विवाद हुँदा पनि महन्थ वैष्णवले रामरोशन नै उत्तराधिकारी महन्थ रहेको स्वीकार गरेका थिए ।

मन्दिरको आर्थिक कारोबार गर्ने अधिकार महन्थलाई मात्रै हुन्छ, रेग्मीले भने ‘त्यसैले उत्तराधिकारी महन्थले आर्थिक हिनामिना गर्न सक्ने कुनै सम्भावना नै बन्दैन ।’

लक्ष्मण मन्दिरको आर्थिक कारोबार सोही मन्दिरका पूजारी सीताशरण दास वैष्णवले हेर्दै आई रहेका छन् । जानकी मन्दिर र लक्ष्मण मन्दिरको विषय अलग अलग रहेकाले दूबै मन्दिरको आर्थिक कारोबार पनि अलग अलग हुँदै आईरहेको गुठी संस्थान जनकपुरधामका प्रमुख रेग्मीले बताए ।

केही दिन अगाडी मात्रै जानकी मन्दिरका उत्तराधिकारी महन्थ रामरोशन दास वैष्णव विरुद्ध जिल्ला प्रशासन कार्यालय धनुषामा उजुरी परेको थियो । उनी बिरुद्ध रामनारायण दासले उजुरी दिएका थिए ।

उत्तराधिकारी महन्थ दास विरुद्ध मिडियामा प्रोपागाण्डा चलाई उनलाई बदनाम गर्न खोजिएको देखिएको छ । महन्थ नियुक्त गर्ने अधिकारिक सँस्थान गुठी सँस्थानका हाकिमले नै रामरोशन दासको परिचय पत्र ओरिजनल रहेको र उनी नै उत्तराधिकारी महन्थ रहेको प्रष्टयाएपछि उजुरी गर्ने व्यक्तिको नियतमाथि शंका उब्जेको छ ।

यता, जिल्ला प्रशासन कार्यालय धनुषाले सो उजुरीको विषयमा अनुसन्धान भईरहेको जनाएको छ । अनुसन्धान जारी नै रहेको र अनुसन्धान बिना केही बोल्न सक्ने स्थिति नरहेकोले यस विषयमा जिल्ला प्रशासन कार्यालय धनुषाले प्रतिक्रिया दिन इनकार गरेको छ ।