जसपा र लोपसाका अध्यक्षसँग डा. सिके राउतको चुनावी भेंट

न्यूज ब्यूरो, जनकपुरधाम । जनता समाजवादी पार्टी (जसपा) नेपालका अध्यक्ष उपेन्द्र यादवलाई कालानाग भन्दै आएका जनमत पार्टीका अध्यक्ष डा. सिके राउतले चुनावी भेंट गरेका छन् ।

विभिन्न समयमा मँचबाट खुल्ला रुपमा यादवलाई मधेशको कालानाग भन्दै आएका डा. राउतले आगामी मँसिर ४ गते हुने चुनावी तालमेलको लागि भेटघाट गरेपछि समाजिक सँजाल तातिएको छ ।

जहरिला काला नाग भन्दै नथाक्ने डा. राउतले सप्तरी निर्वाचन क्षेत्र नम्बर २ बाटै लडने चर्चा पाएलगत्तै उनले उपेन्द्र यादवलाई भेटेका छन् । डा. राउतले लोसपाका अध्यक्ष महन्थ ठाकुरलाई समेत भेटेका छन् ।

सप्तरी जिल्लाको निर्वाचन क्षेत्र नम्बर २ बाट राउत प्रतिनिधि सभामा चुनाव लडन चाहेका छन् । राउतको पैतृक महादेवा गाउँपालिका समेत पर्ने सो क्षेत्रबाट उपेन्द्र यादव निर्वाचित भएका हुन् ।

स्रोतका अनुसार राउतले भेटको क्रममा यादवलाई सो सिट छाडिदिन आग्रह गरेका थिए । सिके राउतले मधेसवादी दलका नेताहरूसँग छलफल गर्ने क्रममा लोसपाका अध्यक्ष ठाकुरलाई पनि भेटेका हुन् ।

ठाकुरसित निरन्तर सम्पर्क र संवादमा रहेका राउतले भने यादवसित पहिलो पटक भेटवार्ता गरेका हुन् । जसपा अध्यक्ष यादवको कटु आलोचना गर्दै आएका राउतले यादवसित चुनावमा तालमेल गरेर जाने विषयमा पनि छलफल भएको बताइएको छ ।

राउतले नेताद्वय यादव र ठाकुरसँग छुट्टाछुट्टै गरेको भेटघाटको तस्विर उनको सचिवालयले आइतबार सार्वजनिक गरेको छ ।

उक्त भेटमा चुनावमा एउटा गठबन्धन बनाएर जानुपर्ने र मधेशका मागमा साझा धारणा बनाउनु पर्नेलगायतका विषयमा छलफल भएको बैठकमा सहभागी जनमत पार्टीका महासचिव चन्दन सिंहले जनाएका छन् ।

स्थानीय चुनावमा राउत नेतृत्वको जनमत पार्टीले अपेक्षाकृत सफलता हासिल गर्न सकेन् । राउतले रोजेको क्षेत्रमा समेत जित्ने सुनिश्चित छैन् । जसपा अध्यक्ष यादवसँगको भेटमा राउतले आफूलाई सप्तरी क्षेत्र नम्बर २ मा सहयोग गर्न र अन्य क्षेत्र रोज्न आग्रह गरेका थिए ।

उनको प्रस्तावमा यादव सकारात्मक रहेको महासचिव सिंहले बताए । ‘राजनीतिमा समर्थन, विरोध र सहकार्य अपरिहार्य हुन्छ ’ महासचिव सिंहले भने, ‘यसलाई व्यक्तिगत रूपमा लक्षित गर्नु उपयुक्त र परिपक्व हुँदैन ।’

नेपाली कांग्रेस नेतृत्वको पाँच दलीय गठबन्धनमा सहभागी हुन प्रयासरत रहेको लोसपाका अध्यक्ष ठाकुरसितको भेटमा राउतले गठबन्धन गर्ने विषयमा नै जोड दिए ।

अघिल्लो दिन राउतसित छलफल गरेका लोसपाका अध्यक्ष ठाकुरले देउवासितको भेटपछि सोमबार (आज) बस्ने कार्यकारिणी समितिको बैठकबाट धारणा सार्वजनिक गर्न सक्ने संभावना छ ।

---

पुनश्चः यसअघिको शिर्षकबाट केही पाठकवर्गमा असर पर्न गएकोप्रति क्षमाप्रार्थी छौँ । तत्परताका साथ शिर्षक सम्पादन गरिएको छ । आगामी दिनमा थप सचेत हुने प्रतिवद्धता जाहेर गर्दछु ।–सम्पादक