जनकपुरः मोटरसाईकल दुर्घटनामा परी एक युवकको मृत्यू, अर्काको अवस्था गम्भिर

न्यूज ब्यूरो, जनकपुरधाम । मधेश प्रदेशको राजधानी जनकपुरधाम क्षेत्रस्थित मोटरसाईकल दुर्घटना हुँदा एक युवकको मृत्यू भएको छ भने अर्का गम्भिर घाईते भएका छन् ।

शनिबार बेलुकी करिब ८ः३० बजेको समयमा धनुषा जिल्लाको सबैला नगरपालिका वडा नं. १० स्थित यदुकूहा–बीरेन्द्रबजार सडकखण्डमा सवारी दुर्घटना भएको हो ।

यदुकूहाबाट बीरेन्द्र तर्फ जाँदै गरेको लु ७१ प ३६२३ नम्बरको मोटरसाईकल दुर्घटना हुँदा चालक धनुषाको जनकनन्दिनी गाउँपालिका वडा नम्बर ५ पतनुका बस्ने बर्ष ३० का मुकेश कापरको मृत्यू भएको हो ।

जिल्ला प्रहरी कार्यालय धनुषाको अनुसार शहिदनगर नगरपालिका वडा नं. ४ हौवाहीस्थित रहेको हाथी पेट्रोल पम्पदेखि करिब ३०० मिटर उत्तर तर्फ सबैला नगरपालिका वडा नं. १० पर्ने सो सडकमा मोटरसाईकल दुर्घटना भएको हो ।

८ः३० बजे नै जानकारी पाएपछि घटनास्थल पुगेको सबैला प्रहरीले मुचुल्का गरेको थियो । मोटरसाईकलमा दुई जना सवार थिए । मुकेशको साथै पछाडी कमला नगरपालिका वडा नं. ४ साघारा बस्ने बर्ष २९ का विनोद साह बसेका थिए ।

गम्भिर घाईते दुवै जनालाई सबैला प्रहरीले यदुकूहा प्रहरीको सहयोगमा प्रादेशिक अस्पताल जनकपुर पठाएको थियो । अस्पतालको चिकित्सकले चालक मुकेश कापरलाई मृत घोषित गरेको जिल्ला प्रहरी कार्यालय धनुषाले जनाएको छ ।

सोही दुर्घटनाका विनोद साहको अवस्था अझै गम्भिर रहेको छ । उनको उपचार जनकपुरको प्रादेशिक अस्पतालमा भइरहेको ईलाका प्रहरी कार्यालय सबैलाका प्रहरी नीरिक्षक राज कुमार सिँहले जानकारी दिए ।

दुर्घटना कसरी भएको भन्ने बारे छानबिनको लागि अहिले सबैला प्रहरी र यदुकूहा प्रहरी सँयुक्त रुपमा शहिदनगर नगरपालिकाको भठ्ठी चौकमा जडान गरिएको सिसिटिभी क्यामेराको फुटेज चेकजाँच गर्न लागिएको बताइएको छ ।

उनीहरुले राती कति बजे तर्फ यदुकूहाको भठ्ठीचोकमा देखिएको, मादक पदार्थ सेवन गरिएको नगरिएको, अन्य कोही पछाडी पारेको जस्ता प्रश्नहरुको जवाफ खोज्न नगरपालिकाले जडान गरेको सिसिटिभी फुटेज चेकजाँचको लागि शहिदनगर नगरपालिकाको आईटी शाखा पुगेका छन् ।

मृतक मुकेश कापर कमला नगरपालिका वडा नं. ४ सघारास्थित रहेको एनआईसी एसिया बैँकमा कार्यरत थिए । उनी विगत एक बर्षदेखि सो बैँकमा कार्यरत रहेका थिए ।