जसपाको पार्टी अफिसभित्रै मन्त्री यादवमाथि ईन्जिनीयरले गरे हातपात

न्यूज ब्यूरो, जनकपुरधाम । जनता समाजबादी पार्टी (जसपा) का नेता एवम् मधेश प्रदेशका राज्यमन्त्री योगेन्द्रराय यादवमाथि एक ईन्जिनीयरले हातपात गरेको घटना बाहिर आएको छ ।

गत साउन ९ गते सोमबार दिउँसो साढे दुई बजे पार्टीकार्यालय बालकुमारी पुगेका राज्यमन्त्री यादवले पार्टी अध्यक्ष उपेन्द्र यादव को बारेमा नाकारात्मक टिकाटिप्पणी गरेपछि आक्रोसित ईन्जिनीयर एवम् जसपाका कार्यकर्ता समेत रहेका ई. सँजीव नारायण यादवबीच हाथाबाही भएको बताइएको छ ।

जसपा अध्यक्ष यादवमाथि नानाथरी टिप्पणी गरेपछि जसपा पार्टी संगै आबद्ध रहेको नेपाल ईन्जिनियरिंग समाजका केन्द्रीय सह–अध्यक्ष ई संजिव नारायण यादवले मन्त्री यादवलाई पार्टी कार्यालयभित्रै झापड हानेको बताइएको छ ।

राज्य मन्त्री यादवले गत स्थानिय निर्वाचनमा अध्यक्षले सहयोग नगरेको ,प्रचार प्रसार नगरेकोले पार्टीको हार भएको र आफुलाई जानीजानी चुनाव हार्ने ठाउँबाट टिकट दिएको आरोप लगाएका थिए ।

अध्यक्ष यादब माथी निरन्तर गाली गलौज गरेपछि ई. यादब र राज्यमन्त्री बीच भनाभन भएको थियो ।

भनाभन उग्र हुदै गएपछि उनीहरु बीच कुटाकुट भएको थियो । उनीहरु कुटाकुट भएको पल्लो कोठमा बसेका पार्टी अध्यक्षका स्वकिय सचिव सुभाष यादवले छुट्याएका थिए ।

मन्त्री यादवमाथि हातपात गरेको भनेर ईन्जिनीयर यादवले स्वीकार समेत गरेका छन् । पूर्वमन्त्री रेणु यादवको तर्फबाट पैरवी गरेका मन्त्री यादवले उपेन्द्र यादवकै कारण स्थानीय तहको चुनावमा खराब परिणाम आएको भनेपछि ईन्जिनियर यादवले रेणु यादवले जथाभावी टिकट दिएपछि जसपाको हालात कमजोर भएको कटाक्ष गरे लगत्तै भिडन्त भएको थियो ।

यता, राज्यमन्त्री यादवले त्यस्तो कुनै पनि घटना नभएको प्रतिक्रिया दिएका छन् । मन्त्री यादवले ईन्जिनीयर यादबलाई सस्तो लोकप्रियताको लागि गलत मिडियावाजी गरेको आरोप लगाएका छन् ।

पार्टी कार्यालयमा एनजिओकर्मी सरोज राय र ईन्जिनीयर सँजीव यादवले तथानाम बोलेपछि विवाद भएको मन्त्री यादवले बताएका छन् । सप्तरीको परिणामलाई लिएर भएको विवादको क्रममा सरोज रायले समेत तथानाम भनेको आरोप मन्त्री रायको छ ।

मन्त्री यादवले पार्टी कार्यालयमा समान्य भनाभन मात्रै भएको दाबी गरेका छन् ।