जनकपुरः बालिकालाई पटक–पटक बलात्कार गरी गर्भवति, ५९ वर्षिय पुरुष पक्राउ

न्यूज ब्यूरो, जनकपुरधाम । मधेश प्रदेशको राजधानी जनकपुरधाम क्षेत्रस्थित एक बालिकालाई पटक पटक बलात्कार गरेको आरोपमा एक जनालाई प्रहरीले पक्राउ गरेको छ ।

धनुषा जिल्लाको मिथिला नगरपालिका वडा नम्बर ९ बेंगाडावरमा बलात्कार गरी एक १४ बर्षीया नाबालिकालाई गर्भवती बनाएको घटना सार्वजानिक भएको हो ।

बलात्कृत नाबालिकाका अभिभावकले आरोपित विरुद्ध प्रहरीमा उजुरी दिएपछि उक्त घटना बाहिरिएको हो ।

प्रहरीले उजुरीको आधारमा बिहिवार बलात्कार आरोपित स्थानीय ५९ बर्षीय सोमबहादुर घिसिङ्गलाई पक्राउ गरेको हो ।

गत बैशाख ५ गते खर्साङ्गे डाडा सामुदायिक वनमा बाख्रा चराउन गएकी ती नाबालिकालाई आरोपित घिसिङ्गले ललाई फकाई जबरजस्ती करणी गरेको प्रहरी जनाएको छ ।

प्रहरीका अनुसार बलात्कृत नाबालिकालाई आरोपित घिसिङ्गले विभिन्न किसिमको डर तरास देखाई पटकपटक जबरजस्ती करणी गर्दै आएको उजुरीमा उल्लेख छ ।

घटनाको तीन महिनापछि शुक्रवार पीडित पक्षले बलात्कार आरोपित विरुद्ध प्रहरीमा जाहेरी दिएको छ । बलात्कृत नाबालिका गर्भवती रहेको समेत ती घटनाको अनुसन्धानमा खटिएका एक प्रहरी अधिकारीले बताए ।

नाबालिकाका बुवाले प्रहरीमा दिएको जाहेरीको आधारमा आरोपित घिसिङ्गलाई पक्राउ गरिएको ईलाका प्रहरी कार्यालय ढल्केवरका प्रहरी निरीक्षक रामसागर सिंंहले जानकारी दिए ।

उनले पक्राउ परेका घिसिङ्गलाई जबरजस्ती करणी मुद्दामा शुक्रवार धनुषा जिल्ला अदालतबाट म्याद थप गराउने तयारी रहेको जनाए ।

बलात्कृत नाबालिकाको शुक्रवार स्वास्थ्य परिक्षण गराईने र घटना सम्बन्धमा थप अनुसन्धान भईरहेको ईलाका प्रहरी कार्यालय ढल्केवरले जनाएको छ ।