जनकपुरवासीको तर्फबाट अयोध्यामा उपहार स्वरुप शिवधनुष राख्ने प्रस्ताव गरेको छुः नीधि

न्यूज ब्यूरो, जनकपुरधाम । नेपाली काँग्रेसका बलिया नेता बिमलेन्द्र नीधिले जनकपुरधाम र जनकपुरधामवासीको तर्फबाट निर्माणधीन राममन्दिरमा शिवधनुष राख्ने प्रस्ताव मात्र भएको बताएका छन् ।

सँचारमाध्यमहरुमा ५० किलो चाँदीको धनुष अयोध्याको राममन्दिरमा राख्न गइरहेको तथ्य बाहिरिएपछि पूर्व गृहमन्त्री समेत रहेका नेता नीधिले आफ्नो व्यक्तिगत तर्फबाट नभई जनकपुरधाम र जनकपुरधामवासीको तर्फबाट पौराणिक धार्मिक सम्बन्ध जुडाउन धनुष राख्ने प्रस्ताव मात्र गरेको बताएका छन् ।

न्यूज ब्यूरोसँग कुराकानी गर्दै नेता नीधिले भने,–“अहिले हामी कतै पनि कुनै धनुष लिएर गईरहेका छैनौँ । भगवान र माता जानकीको विवाह हुँदा भगवान रामले भाँच्नुभएको पिनाकल धनुष अर्थात शिव धनुषसँग राम जन्मभूमिको सम्बन्ध जुडाउन खोजेको छु । यो त पौराणिक धार्मिक सम्बन्धलाई धनुषसँग जोडन मात्र खोजेको छु ।”

सँचारमाध्यमहरुमा आएको ५० किलोको चाँदीको धनुष लिएर जाँदै गरेको कुराका कुनै सत्यता नरहेको बताउँदै उनले अयोध्यामा राममन्दिर निर्माण समितिका प्रतिनीधि सम्पत रायसँग जनकपुरधामवासीको तर्फबाट, जानकी मन्दिरको तर्फबाट “पिनाकल धनुष” राख्ने प्रस्ताव गर्न मात्र जान लागेको बताए ।

राममन्दिर निर्माणमा विश्वस्तरबाट विभिन्न तवरले सहयोग हुँदै आएको बताउँदै उनले जनकपुरधामवासीको तर्फबाट भगवान रामको मन्दिरमा बेग्लै एक पिनाकल धनुष अर्थात शिव धनुष उपहार दिन लागेको बताए ।

उनले भने, –“भगवान राम र सीताको विवाह हुँदा भगवान रामले जुन शिव धनुष भाँच्नुभएको थियो, त्यो शिव धनुष उठाउने साहस अरुमा थिएनन् । त्यही पिनाकल धनुषलाई माता सीताले रखवारी (सुरक्षा) गर्दै आएकी थिइन् । राजा जनकले सीताको विवाहको लागि गरेको धनुषयज्ञको आधारलाई बरकरार राख्न जनकपुरधामवासीको तर्फबाट धनुष राख्ने प्रयास गरेका छौँ ।”

तत्कालिन समयमा राजा जनकको दरबारमा शिव धनुष सबभन्दा ठुलो अस्त्र रहेको र सो अस्त्रलाई माता सीताले रेखदेख गर्दै आएको आधारलाई जीवन्त राख्नको लागि पनि जनकपुरधामवासीको तर्फबाट भगवान रामको लागि उपहार पठाउने प्रस्ताव गरेको बताए ।

नेता नीधिले राममन्दिर निर्माण समितिका प्रतिनीधि सम्पत रायसँग निरन्तर वार्तालाप भइरहेको र जानकी मन्दिरको समन्वयमा सो प्रस्ताव लिएर अयोध्या जान लागेको बताए ।

“अहिले कुन साईजको, कुन डिजाईनको र कुन पदार्थको धनुष बनाउने निर्णय भईनसकेको छ । कुशल आर्टिटेक्टबाट भगवान रामको मन्दिरमा मापदण्ड मिल्ने गरी धनुष बनाउने छौँ, तर अहिले नै कुनै निर्णय भएको छैन् । सुनको दिने की चाँदीको, हिराको दिने की फलामको वा अन्य कुनै पदार्थको दिने भनेर फाईनल भएको छैन् । समितिसँग प्रस्ताव पास भए मात्र प्रक्रिया अगाडी बढाइने छ ।”– नीधिले भने ।

विगत डेढ बर्षद्ेखि जनकपुरधामवासीको तर्फबाट भगवान राम मन्दिरमा उपहार स्वरुप धनुष दिने प्रयासमा लागेको बताउँदै उनले रामसीताको विवाह भएको आधारको रुपमा राम मन्दिरमा छुट्टै कक्ष बनाएर राख्ने प्रस्ताव गरेको बताए ।

राम मन्दिर जस्तौ पौराणिक मान्यता विश्वको दृष्टि पर्ने पवित्र स्थानमा जनकपुरधामवासीको तर्फबाट जाने उपहारलाई विशेष स्थान पाए जनकपुरधामवासीको लागि यो भन्दा गौरव र आस्थाको कुरा के हन सक्छ र ? उनले थपे ।

नेता नीधि विहिबार दिउँसो भैरहवा नाकाबाट भारतको गोरखपुर हुँदै अयोध्या पुग्ने बताए । राममन्दिर निर्माण समितिसँग प्रस्ताव पारित भए जनकपुरधामवासी गौरवान्वित हुने बताए ।

जनकपुरधामवासीको तर्फबाट राम मन्दिर जस्तो विश्वप्रसिद्ध आस्था स्थानमा छुट्टै कक्षमा सीताको शिवधनुष राख्ने भएपछि नेता नीधिले चौतर्फी प्रशँसा बटुलेका छन् ।