जनकपुर भानुचोक पजियार भवनका मालिक उपर पक्राउ पूर्जी जारी

न्यूज ब्यूरो, जनकपुरधाम । मधेश प्रदेशको राजधानी जनकपुरधामको मुट मानिएको भानुचोकस्थित रहेको चर्चित पजीयार भवनमा मालिक पैसा लिएर फरार भएको छ ।

पजियार भवनका मालिक रहेका जगनाथ पजियारले एक व्यक्तिको ३० लाख रुपैयाँ लिएर सम्पर्कविहिन भएपछि अदातलमा मुद्दा दायर गरिएको हो ।

धनुषा जिल्ला अदातलले धनुषाको औरही गाउँपालिका वडा नम्बर २ देउरी बस्ने अशोक यादवको जाहेरीले प्रतिवादी भनिएको सबैला नगरपालिका वडा नं. १० तथा हाल जनकपुरधाम उपमहानगरपालिका वडा नम्बर २ भानुचोक बस्ने जीवछ पजीयारका छोरा जगन्नाथ पजियारमाथि बिगो मुद्दा दायर गरिएको हो ।

गत असार ३१ गते जारी गरिएको पक्राउ पूर्जीमा वादी अशोक यादवले दिएको बिगो मुद्दामा जगन्नाथ पजीयारलाई पक्राउ गरी अदातलमा हाजिर गराउन उल्लेख गरिएको छ ।

अदालतको पक्राउ पूर्जीमा उनी उपर सोही मुद्दामा एक बर्षको जेल समेत सजाय तोकिएको उल्लेख गरिएको छ ।

धनुषा जिल्ला अदालतले गत जेठ २० गते गरेको निर्णय अनुसार उनलाई एक बर्षको सजाय भनिएको र तत्काल पक्राउ गरी अदालतमा बुझाउन आदेश गरिएको हो ।

जानकारी अनुसार, पजीयार यादवसँग ३० लाख रुपैयाँ लिएर सम्पर्कविहिन रहेको छ । भानुचोकमै रहेको पजीयार भवन त्यहाँ व्यावसायिक दृष्टिकोणले चर्चित भवन मानिएको छ ।

पजियारको जनकपुरधामस्थित भानु चोकमा पनि ठूलो घर छ । उनी यहीं बस्दै आएका छन् ।

अदालतले प्रहरी समेतलाई पक्राउ गर्न पत्राचार गरेको जानकारी पाएपछि उनी फरार भएका हुन् । प्रहरीले उनको खोजी भइरहेको जनाएको छ ।