बाख्रा चराउन गएकी महिलाको दुई दिनपछि खोलामा लास

न्यूज ब्यूरो, सिरहा । मधेश प्रदेशको सिरहा जिल्लास्थित बाख्रा चराउन गएकीम एक महिलाको लास दुई दिनपछि खोलामा फेला परेको छ ।

सिरहामा बाख्रा चराउने क्रममा हराएकी एक महिलाको शव दुई दिनपछि फेला परेको हो । गत बिहीबारदेखि हराएकी ती महिलाको शव शनिबार साँझ स्थानीय कटनियाँ खोलामा फेला परेको हो ।

सिरहाको विष्णुपुर गाउँपालिका–२ बस्ने ४७ वर्षीया उर्मिलादेवी यादवको शव खोलामा फेला परेको प्रहरीले जनाएको छ ।

बाख्रा चराउन भन्दै घरबाट हिँडेकी उनी घर नफर्केपछि खोजतलास गर्ने क्रममा खोलामा शव फेला परेको जिल्ला प्रहरी कार्यालय सिरहाका प्रवक्ता प्रहरी नायब उपरीक्षक सुभाष बुढाथोकीले जानकारी दिए ।

शव परीक्षणका लागि लहानस्थित प्रदेशिक अस्पताल पठाइएको र घटनाबारे थप अनुसन्धान भइरहेको उनले बताए ।