क्षीरेश्वरनाथ नगरपालिकामा कर्मचारीको असुली धन्दा, सेवाग्राहीबाट यसरी लिन्छन घुस

न्यूज ब्यूरो, जनकपुरधाम । मधेश प्रदेशस्थित धनुषा जिल्लाको क्षीरेश्वरनाथ नगरपालिकामा एक कर्मचारीले सेवाग्राहीबाट खुल्लेआम अतिरिक्त रकम लिएको भिडियो सार्वजनिक भएको छ ।

क्षीरेश्वरनाथ नगरपालिकाको वडा नम्बर ५ को वडा कार्यालयमा कार्यरत कार्यालय सहयोगी प्रदीप यादवले वडामा सिफारिसको लागि आउने सेवाग्राहीहरुबाट अतिरिक्त रकम उठाउने गरेको भिडियो सार्वजनिक भएको छ ।

सोमबार दिउँसो वडा कार्यालयमा चारकिल्ला प्रमाणित गर्न गएकी एक महिला सेवाग्राहीबाट कर्मचारी भनिएका प्रदीप यादवले ५०० रुपैयाँ लिएको भिडियोमा बयान दिईएको छ ।

कार्यालय सहयोगी मात्र रहेका प्रदीप यादवले सेवाग्राहीहरुबाट ४०० रुपैयाँदेखि ५०० रुपैयाँसम्म प्रति सेवाग्राही लिँदै आएको भिडियोबाट प्रष्ट देखिएको छ ।

नगरपालिकाले सिफारिस दस्तुर निःशुल्क पारेको तथा कुनै पनि सिफारिसको लािग दस्तुर लिँदा सरकारी रसिद दिनुपर्नेमा यादवले सो नदिइनकनै सेवाग्राहीहरुबाट रकम असुलेको देखिएको छ ।

साउन १ गतेदेखि हटाईएको भनिएको प्रदीप यादवले आफू कार्यालय सहयोगी र कम्प्यूटर अपरेटर रहेको बताउँदै भोलाभाला सेवाग्राहीहरुबाट ५०० रुपैयाँ लिने गरेको खुलेको छ ।

उनले सरकारी रसिद दिनुभन्दा पनि आफ्नो एउटा कापीमा को बाट कति लियो भनेर रेकर्ड राख्ने गरेको छ । अक्षर नजान्ने सेवाग्राहीलाई झेल गर्दै यादवले सिफारिस वापतको सरकारी दस्तुर लिएको बताउँदै आएका थिए ।

सोमबार केही युवकहरुले वडा कार्यालयमा गएर ५०० रुपैयाँ सिफारिस वापत केको आधारमा लिएको तथा लिएको रकमको रसिद किन नदिएको भनेपछि उनी भाग्न खोजेका थिए ।

जानकारी अनुसार, साउन १ गतेदेखि करारका कर्मचारीहरुलाई क्षीरेश्वरनाथ नगरपालिकाले हटाएको छ ।