जनकपुरः जीप दुर्घटनामा परी एक व्यापारीको मृत्यू

न्यूज ब्यूरो, जनकपुरधाम । मधेश प्रदेशको राजधानी जनकपुरधाम क्षेत्रस्थित सवारी दुर्घटनामा परी एक व्यापारीको मृत्यू भएको छ ।

सवारी दुर्घटनामा धनुषा ढल्केवरका एक जना कपडा व्यापारीको मृत्यु भएको हो ।

दुर्घटनामा मिथिला नगरपालिका–६ ढल्केवरका ४५ वर्षिय शिवलाल यादव कपडा व्यापारीको मृत्यु भएको हो ।

शनिबार राति १० बजे जिल्लाको मिथिला नगरपालिका वडा नम्बर ६ स्थित ढल्केवर–जनकपुर सडकखण्डमा जनकपुरबाट ढल्केवरतर्फ आउँदै गरेको बिआर ०१ एआर ९७७० नम्बरको भारतीय जीपले सोही दिशाबाट आइरहेको ज ९ प ९४३५ नम्बरको मोटरसाइकल ठक्कर दिएको थियो ।

प्रहरीका अनुसार पछाडिबाट तीव्र गतिमा आइरहेको भारतीय नम्बरको जीपका चालक बसही पुल नजिक आएर सन्तुलन गुमाएपछि जीप पल्टिएर यादव सवार मोटरसाइकलमाथि बजारिन पुगेको थियो ।

सो सवारी दुर्घटनामा गम्भीर घाइते भएका यादवको उपचारको क्रममा शनिबार राति साढे एघार बजे प्रादेशिक अस्पताल जनकपुरमा मृत्यु भएको प्रहरीले जनाएको छ ।

दुर्घटनामा संलग्न जीप र त्यसका चालक बिहार मधुबनी जिल्ला धजवा बस्ने ३६ वर्षिय मन्जय कुमार साहलाई प्रहरीले नियन्त्रणमा लिएको छ ।

मृतक यादव ढल्केवरस्थित दुर्गामन्दिर नजिक बिसौं वर्षदेखि कपडाको व्यापार गर्दै आएका थिए ।

शनिबार बिहान मात्र जनकपुरधाम–ढल्केवर सडकखण्डको मिथिला नगरपालिका वडा नम्बर २ नक्टाझिझस्थित दुई मोटरसाईकल एक आपसमा ठोक्किदा दुई जना गम्भिर घाईते भएका थिए ।