उपमेयर बन्ने लोभमा शिक्षिकाले दिइन राजीनामा, टिकट नपाएपछि पुनः विद्यालयमा गएपछि हँगामा

न्यूज ब्यूरो, जनकपुरधाम । मधेश प्रदेशको धनुषा जिल्लास्थित एक विद्यालयमा मँगलबार अभिभावकहरुले तालाबन्दी गरेको छ ।

धनुषाको गणेशमान चारनाथ नगरपालिकाको बरमझियास्थित रहेको माध्यमिक विद्यालय बरमझियाका प्रधानाध्यापकले राजीनामा गरि सकेकी शिक्षिकालाई पुन विद्यालयमा हाजिरी गराएको भन्दै स्थानीयबासीहरुले तालाबन्दी गरेको छ ।

विद्यालयका प्रधानाध्यापक राजदेव यादवले आर्थिक प्रलोभनमा परि स्वच्छीक राजीनामा दिएका शिक्षिका रेखा यादवलाई पुन हाजिरी गराइ कामकाजमा लगाएको विरुद्धमा स्थानीय बासी आन्दोलित भएको हो ।

स्थानीय तहको निर्वाचनमा उपमेयर पदमा उमेदबार बनेकी रेखा यादवले बैसाख ८ गते राजीनामा दिएकी थिइन् । विद्यालयमा प्रत्यक्ष राजनीति हुने गरेकोले पठनपाठनमा असर परेको स्थानीयबासीहरुले बताउने गरेका छन् ।

त्यतिकै पनि विद्यालयमा शिक्षिकको अभाव रहेको छ । केही शिक्षकहरुले खुल्ला राजनितिक गरिरहेको कारण विद्यालयको शैक्षिक अवस्थामा नकारात्मक प्रभाव परेको वडा अध्यक्ष नन्दकिशोर यादवले बताए ।

अपुग शिक्षक र विभिन्न राजनीतिक उथलपुथलको कारण विद्यालयमा पुर्ण कक्षा संचलान हुन नसकेको विद्यार्थीहरुको गुनासो रहेको छ ।

माध्यमिक विद्यालय बरमझियामा रेखा यादव प्रावि तह राहत तृतीय श्रेणी पदमा कार्यरत रहँदै आएकी थिइन। स्थानीय तहको निर्वाचन नजिकिदै गर्दा शिक्षिका रेखा यादवले विद्यालयको प्रधानाध्यापकलाई संवोधन गर्दै मिति ०७९ बैसाख ८ गते घरायसी कारण देखाइ राजीनामा दिएको थियो ।

राजिनामा पत्रमा प्रधानाध्यापक राजदेव यादवले तोक लगाइएको अवस्थामा मिति ०७९ बैसाख ८ गते नै दर्ता गरि राखिएको देखिन्छ ।

दर्ता नम्बर २१ रहेको दर्ता किताबबाट देखिन्छ । मिति ०७९ बैसाख ९ गते देखि लागू हुने गरि प्रअ राजदेव यादवले राजिनामा स्वीकृत गरिएको मिति ०७९ बैसाख ९ गते पत्र सँख्या २०७८/०७९ च. नं. ६२ को पत्र रेखा यादवको नाममा पठाएको देखिन्छ ।

उक्त पत्रको वोदार्थमा जिल्ला शिक्षा विकास समन्वय इकाई धनुषा र गणेशमान चारनाथ नगरपालिका बिरेन्द्रबजार उल्लेख गरिएको छ ।

ती सक्कल राजिनामा पत्र र सक्कल स्वीकृत गरिएको पत्र र सक्कल दर्ता चलानी किताब समेत लुकाएर राखेको र रेखा यादवलाइ पुनः विद्यालयमा हाजिरी गराइ कामकाजमा लगाइएकोले विद्यार्थी तथा स्थानीयबासी केही दिन देखि आन्दोलित भएका छन् ।

शिक्षिा जस्तो संवेदनशिल विषयमा पनि जिल्ला शिक्षा विकास समन्वय इकाइ धनुषा र नगरपालिकाको कार्यालयले कुनै प्रकारको प्रतिक्रिया नजनाउनु कतै न कतै यीनीहरुको मिलोमतो रहेको त छैन ? भन्ने प्रश्न अभिभावकहरुले गरिरहेको छ ।

यस प्रकारले मन लागेको खण्डमा चुनाव लड्नलाई राजीनामा दिने र चुनाव सकेपछि पुनः राजीनामा फिर्ता लिइ सोही पदमा कार्यरत हुन गैर कानुनी रहेको छ ।