सिरहा : बोक्सीको आरोप लगाएर मलमूत्र खुवाएको आरोपमा २ जना पक्राउ

न्यूज ब्यूरो, सिरहा। मधेश प्रदेशको सिरहा जिल्लामा बोक्सीको आरोप लगाएर मलमूत्र खुवाएको आरोपमा दुई जना पक्राउ परेका छन् ।

सिरहाकी एक महिलालाई बोक्सीको आरोप लगाएर मलमूत्र खुवाएको आरोपमा प्रहरीले दुई जना महिलालाई पक्राउ गरेको छ । भगवानपुर गाउँपालिका–४ ठाडी टोल बस्ने ६० बर्षीया आतिका देवी कामैतलाई बोक्सीको आरोपमा मलमूत्र खुवाएको आरोपमा उनीहरुलाई पक्राउ गरिएको सिरहा प्रहरीका प्रवक्ता एवं डीएसपी सुवास बुढाथोकीले जानकारी दिए ।

पक्राउ पर्नेमा सोही ठाउँकी ३० बर्षीया फुलोदेवी साह र ५५ बर्षीया कोशिला साह छन् । उनीहरुलाई इलाका प्रहरी कार्यालय लहानको नियन्त्रणमा राखी बोक्सी आरोप कसूरमा मुद्दा दर्ता गरी अन्य अनुसन्धान गरिरहेको प्रहरीले जनाएको छ ।

प्रहरीका अनुसार यी दुबैले ११ असारको दिउँसो १२:३० बजेतिर कामैतलाई मलमूत्र खुवाएका थिए । मधेश प्रदेशमा बोक्सीको आरोप लगाएर मलमूत्र खुवाएको घटना दिनहुँ भईरहेको हुन्छ । यसका निम्ति नेपाल सरकारद्वारा जनचेतना मुलक कार्यक्रम चलाउनु पर्ने बुद्धिजीवीहरुको भनाई रहेको छ ।