होटलमा किशोरीलाई सामुहिक बलात्कार प्रकरणका एक आरोपितलाई थुनामा राख्ने आदेश

न्यूज ब्यूरो, जनकपुरधाम । मधेश प्रदेशको राजधानी जनकपुरधाम क्षेत्रमा एक किशोरीमाथि सामुहिक बलात्कार भएको प्रकरणमा एक आरोपितलाई पूर्व पक्षको लागि थुनामा राख्ने आदेश भएको छ ।

धनुषाको क्षीरेश्वरनाथ नगरपालिकाकी एक १८ बर्षीया किशोरीमाथि सामुहिक बलात्कार भएको घटनामा जिल्ला अदालत धनुषाले एक आरोपितलाई थुनामा राखेर अनुसन्धानको आदेश दिएको हो ।

क्षीरेश्वरनाथ नगरपालिका वडा नम्बर ५ बस्ने सिकिन्द्र साहलाई सोमबार जिल्ला अदालत धनुषाले पूर्वपक्षको लागि थुनामा राख्ने आदेश दिएको हो ।

घटनामा संलग्न भनिएका अझै तीन जना फरार रहेको ईलाका प्रहरी कार्यालय ढल्केवरले जनाएको छ । गत चैत १ गते उनीहरुले ती किशोरीलाई घरबाट मिथिला नगरपालिका–५ मा ल्याई जवरजस्ती करणी गरेका थिए ।

पीडित पक्षले जवरजस्ती करणीको आरोपमा उनीहरुमाथि ईलाका प्रहरी कार्यालय ढल्केवरमा किटानी जाहेरी दिएका थिए । प्रहरीले त्यो मुद्दा जेठ ३ गते दर्ता गरेको थियो । प्रहरी स्रोतका अनुसार धनुषा जिल्ला अदालतले आरोपितहरु विरुद्ध पक्राउ पुर्जी नै जारी गरेका थिए ।

आरोपितहरुमध्ये सिकीन्द्र साहलाई पक्राउ गरी प्रहरीले मुद्दा चलाएको थियो । उनलाई गत जेठ १६ गते पक्राउ गरेको थियो ।

पीडित भनिएकी किशोरीलाई न्याय दिलाउनको लागि महिला तथा बालबालिका क्षेत्रमा निरन्तर कार्यरत माईती नेपाल धनुषाका कार्यक्रम सँयोजक पुरुषोत्तम यादवले ठुलो भूमिका निर्वाह गरेका थिए ।

निरन्तर पीडित परिवारसँग सम्पर्क बनाएर यादवले पीडित किशोरीको न्यायको लागि प्रशासनीक गुहार लगाउँदै आएका हुन् । सो क्रममा उनले विभिन्न पक्षको दबाब समेत खेप्नु परेको बताएका छन् ।

पीडक भनिएको पक्षबाट चौतर्फी दबाब आउँदा पनि हरेष नखाएका कार्यक्रम सँयोजक यादवले पीडित किशोरीको न्यायको लागि सदैव खटिरहने बताए ।