सस्तो लोकप्रियताको लागि ठेक्का नलाग्दै मन्त्री र साँसद यादवले शिलान्यास गरेको सडक बने नदी

न्यूज ब्यूरो, सिरहा । 'हडबडीको विवाह, कनपट्टिमा सिन्दुर' भने झैँ नेपाल सरकारको भौतिक पूर्वाधार तथा यातायात मन्त्री रेणु यादव र सिरहाका सँघीय साँसद राजकिशोर यादवले शिलान्यास गरेको सडकको दुर्गतिले आम नागरिक सास्तीमा परेका छन् ।

गत वर्षको चैत ११ गते सिरहा जिल्लामा २ ठुला सडकको शिलान्यास भनेर सस्तो लोकप्रियताको लागि प्रचार प्रसारले आसा पाएका आम नागरिकहरुले अहिले सडकमा नदी पाएका छन् ।

चोहर्वा–सिरहा–माडर चार लेन र मिर्चैया–कल्याणपुर–सिरहा दुई लेन गरी दुवै सडकको योजनाको भौतिक पूर्वाधार तथा यातायातमन्त्री रेणु यादव र जसपा नेता तथा सिरहा निर्वाचन क्षेत्र नम्बर ४ का प्रथिनिधिसभा सांसद समेत रहेको राजकिशोर यादवले संयुक्त्त रुपमा शिलान्यास गरेका थिए ।

दुबै सडकका लागि पहिलो चरणमा भौतिक पूर्वाधार तथा यातायात मन्त्रालयले ४०/४० करोड रुपैयाँ विनियोजन गरेको बताइएको थियो । असारसम्म सो सडकमा प्रगति मात्र नभएर दुई बर्षभित्र सडक कालोपत्रे हुने भनेर प्रचार प्रसार गरिएपनि वास्तविकता देखिएपछि आम जनता आक्रोसित बनेका छन् ।

२२ मिटर चौडाइ रहने चोहर्वा–सिरहा–माडर चार लेन सडकखण्डमा पहिलो चरणमा २५ सय ५० मिटरको काम हुने र गाउँ क्षेत्रमा १४ मिटर र शहरी क्षेत्रमा १८ मिटर कालोपत्रे गर्ने योजना रहेको बताइएको थियो। तर, हाल चोहर्वा–सिरहा–माडर सडक चोहर्वा देखि नरहा बल्कावा चौक २ लेन मात्र मर्मत गरेर छाडिएको छ ।

सडक निर्माणको समयावधि २ वर्षको रहेको छ तर शिलान्यास गरेको ३ महिना बितिसक्दा पनि मिर्चैया–कल्याणपुर–सिरहा सडक जिर्ण अवस्थामा अलपत्र रहेको छ ।

बर्षौ देखि सडक जीर्ण हुँदा स्थानीय बासी सर्वसाधारणले सास्ती भोग्दै आएका छन्। सो सडकको ठेक्का नलाग्दै सस्तो लोकप्रियताको लागि मन्त्री यादव र साँसद यादवले जनताको आँखामा धुल झोँके ।

बर्षायाम सुरु भएलगत्तै सो सडकमाथिबाट नदी सँचालन भएको छ । सवारी आवागमनमा अधिक कठिनाई हुनुको साथै अधिक बर्षा भएपछि सवारी आवागमन समेत ठप्प हुने गरेको छ ।