पोखरी सौन्दर्यीकरणमा ठेकेदारको घोटाला, ३ करोडको बजेटमा ३ नम्बरी काम, ४ दिनमै भत्कियो पर्खाल

न्यूज ब्यूरो, जनकपुरधाम । मधेश प्रदेशको मुख्यमन्त्रीको सरसफाई कार्यक्रम अन्तर्गत पोखरी सौन्दर्यीकरणमा ३ नम्बरी कार्य भइरहेको पाईएको छ ।

मधेश प्रदेशको धनुषा जिल्ला कमला नगरपालिका वडा नम्बर २ माचि झिटकैयास्थित हुन लागेको पोखरी सौन्दर्यीकरणमा ३ नम्बरको कार्य भइरहेको पाईएको छ ।

मधेश सरकारको बजेटबाट माचि झिटकैयास्थित रहेको सो पोखरीको सौन्दर्यीकरणको लागि आएको बजेटको व्यापक दुरुपयोग भइरहेको देखिएको छ । ठेकेदारले कबुल गरेको मापदण्ड विपरित कार्यहरु गरिरहेका छन् ।

मापदण्डमा तोकिएको भन्दा तीन गुणा कमसल निर्माण समाग्री प्रयोग गर्दा बनाएको ४ दिनमै पर्खाल भत्किएको हो । पोखरीको चारैतर्फ बनाइने छठ घाटको लागि निर्माण समाग्री अति नै कमलस वस्तु प्रयोग गरेको पाईएको छ ।

निर्माण स्थलमा ठेकेदारले कमसल सिमेन्ट, सिमेन्टको मात्रा अत्यन्तै कम दिने, अधिक माटो भएको बालुवा प्रयोग, ३ नम्बर भनिने सबभन्दा कम गुणस्तरको ईटा प्रयोग गर्न थालेपछि केही स्थानीयहरुले विरोध जनाएका छन् ।

उनीहरुले गाउँमा पहिलो पटक यतिको बजेटको सुन्दर कार्य हुन गईरहेकोमा यतिको कमसल निर्माण समाग्री प्रयोग गरे बन्न नदिने अडान लिएका छन् । माचि झिटकैया र सो क्षेत्रमा पोखरी सौन्दर्यीकरणको लागि मोटो बजेट सोही पोखरीमा मुख्यमन्त्रीले दिएका हुन् ।

जनता समाजवादी पार्टीका जिल्ला अध्यक्ष पशुपति यादवको बिशेष पहलमा आएको सो बजेटले सुन्दर र ठोस कार्यको परिकल्पना गरिएपनि ठेकेदारले दुई नम्बरी कार्य गरिरहेको पाईएको छ ।

ईन्फास्ट्रक्सचर एस एण्ड बि बिल्डर नामक निर्माण कम्पनीले पाएको सो ठेक्कामा व्यापक अनियमितता भएको देखिएको छ । ईटाको गुणस्तर सबभन्दा कम राखिएको छ । त्यसमा पनि पर्खाल जोडने कार्यमा बालुवाको ८ भागमा १ भाग सिमेन्ट प्रयोग गर्ने गरेको पाईएको छ । मापदण्डमा ४ भागमा १ भाग प्रयोग गर्न भनिएको छ ।

यस्तै, ईटा एक नम्बरको प्रयोग गर्न भनिएपनि उनीहरुले ३ नम्बर भनिने सबभन्दा कम गुणस्तरको ईटा लगाउने गरेको छ । ठेकेदारले सुरुदेखि नै सो स्तरको काम गर्दै आएको छ ।

सुरुमा कसैले विचार नगरेपनि केही दिनपछि स्थानीयहरुले पर्खाललाई हातले धक्का दिँदा भत्किने गरेको छ । माटो अडकाउन बनाइएको पर्खाल बनाएको ४ दिनमै भत्किएको हो ।

पर्खालको लागि पहिले दिने सोलिँगमा समेत अर्धपाक भएको ईटा प्रयोग गर्दा कार्यको गुणस्तर अति न्यून देखिएको छ । ३ करोडको मोटो लागतमा बन्न लागेको सो सौन्दर्यीकरणमाको क्रममा मन्दिर समेत बन्ने भएको छ ।

यहाँका स्थानीयहरुको लागि आस्थाको केन्द्र मानिने छठ पर्वको लागि छठ घाट, मन्दिर, चारैतर्फ फलामे बेन्च, पार्क, स्ट्रीट लाईट, महिला पुरुषको लागि शौँचालय बन्ने सहमति भएको छ ।

तर, सो निर्माण कार्यको लागि आधार नै सबभन्दा कम गुणस्तरको निर्माण भइरहँदा पनि कुनै सरोकारबालाले ध्यान दिएका छैनन् । गाउँलेहरुले अवरोध गरेपछि काम गर्ने मिस्त्रीले समेत धम्काउने गरेको देखिएको छ ।

जसपाका जिल्ला अध्यक्ष पशुपति यादवको प्रतिष्ठासँग समेत जुडेको यो प्राजेक्टको उदघाटनको लागि वडा नं. २ का पूर्व वडाध्यक्ष धनेश्वर यादव, धनुषा निर्वाचन क्षेत्र नम्बर (ख) का प्रदेश साँसद एवम् सफाई अभियन्ता राम अशिष यादव र जिल्ला अध्यक्ष पशुपति यादवले सँयुक्त रुपमा पोखरी सौन्दर्यीकरणको शिलान्यास गरेका थिए ।

केही स्थानीयहरुले काममा कुनै प्रकारको अवरोध नरहेको तथा काम दुरुस्त मात्र हुनुपर्ने माग राखेका छन् । यस सन्दर्भमा जिल्ला अध्यक्ष पशुपति यादवले गुणस्तरीय काममा कुनै प्रकारको सम्झौता नगर्न भनेका छन् ।