चट्याङ लागेर सिरहामा एक जनाको मृत्यु, २ वटा राँगा पनि मरे

न्यूज ब्यूरो,सिरहा। सिरहामा चट्याङ लागेर बुधबार एक जनाको मृत्यु भएको छ । एक जना घाइते छन् । धनगढीमाई नगरपालिका–१३ भाल्टरका ४० वर्षीय बुद्धबहादुर तामाङको चट्याङ लागरे मृत्यु भएको हो ।

बिहान हावाहुरीसँगै पानी परेको समयमा परेको चट्याङबाट घरमै बसिरहेका तामाङको मृत्यु भएको जिल्ला प्रहरी कार्यालय सिरहाका सूचना अधिकारी डीएसपी सुवास बुढाथोकीले जानकारी दिए ।

चट्याङ लागेर बेहोस भएका उनलाई उपचारका लागि धनगढीमाई नगरपालिका–९ स्थित आरके मेडिसिटी अस्पताल ल्याए पनि अस्पतालले मृत घोषणा गरेको थियो ।

यसैगरी, मिर्चैया नगरपालिका–९ देउरालीका ५६ वर्षीय कुमलाल योञ्जन बिहान चट्याङ लागेर घाइते भएका छन् । घर नजिकैको गोठमा बसिरहेका बेला परेको चट्याङ लागेर समान्य घाइते उनको स्थानीय स्वास्थ्य संस्थामा उपचार गरिएको छ । चट्याङ लागेर उनको गोठमा रहेको २ वटा राँगा मरेका छन् ।