बिहेमा नआउन भनेपछि बुहारीले गराइन ससुरा र देवरको हत्या, तीन जना पक्राउ

न्यूज ब्यूरो, सिरहा । मधेश प्रदेशको सिरहाजिल्लास्थित गत जेठ ७ गते राती भएको बाबुछोराको हत्या काण्डमा बुहारीकै सँलग्नता रहेको प्रहरीले जनाएको छ ।

युवकको विवाहको तीन दिनअघि घरमै सुतिरहेका बाबुछोराको धारिलो हतियारले हत्या गरेको घटनाको १० दिनपछि सिरहा प्रहरीले तीन जनालाई पक्राउ गरी सार्वजनिक गरेको छ ।

जिल्ला प्रहरी कार्यालय सिरहाको टोलीले सक्रियता देखाएपछि हत्याको १० दिनपछि नै तीन जनालाई पक्राउ गरी सार्वजनिक गरेको छ ।

पक्राउ पर्नेमा मृतककी साइली बुहारी अर्नामा गाउँपालिका घर भइ गोलबजार नगरपालिका–४ मा बस्दै आएकी २६ वर्षीया शान्तिदेवी पाल, गोलबजार–४ का ६५ वर्षीय बेचु पाल र अर्नामा–१ महनौरका ४८ वर्षीय जनिफ मियाँ रहेको जिल्ला प्रहरी कार्यालय सिरहाले जनाएको छ।

जेठ ७ गते राती अर्नमा गाउँपालिका वडा नम्बर १ महनौरस्थित पाल टोलमा छोराको विहेको तीनदिन अघि नै हत्या काण्ड भएको थियो । सोही टोलका स्थानीय ६० वर्षीय लुचाइ भन्ने चन्देश्वर पाल र उनका १९ वर्षीय छोरा सन्तकुमार पालको हत्या गरिएको अवस्थामा घरमै लास फेला परेको थियो।

सन्तकुमारको विवाह जेठ ११ गतेका लागि तय भएकोमा गाउँका स्थानीय महिलाहरु गीता गाएर गइसकेपछि छुट्टाछुट्टै कोठामा सुतेका बुवा छोराको टाउको, गर्दन, ढाडलगायतमा धारिलो हतियार प्रहार गरी हत्या गरिएको थियो। यस घटनामा प्रहरीले अनुसन्धान गर्दै जाँदा दाइजोको रिसइवी र पारिवारिक विवादको कारण बुवा र छोराको हत्या भएको खुलेको छ।

सन्तकुमारको विवाह जेठ ११ गतेका लागि मोरङ जिल्लाकी युवतीसँग तय भएको थियो। दाइजोमा उनलाई केटी पक्षले १ लाख नगद, एउटा मोटरसाइकल तथा ८ आना सुन दिने सहमति गरेका थिए। तर सन्तकुमारसँग विवाह तय हुनुभन्दा पूर्व युवतीको विवाह सिरहाकै गोलबजार बस्ने बेचु पालका छोरा प्रदीप पालसँग तय भएको थियो।

केटी पक्षले उनलाई दाइजोमा विराटनगरमा घडेरी दिने, उक्त घडेरीमा घर बनाइदिने र केटालाई व्यापार व्यवसाय गर्नका लागि लगानी पनि गरिदिने सहमति भएको थियो। तर पछि बेचुका छोरा प्रदीपले युवतीको पहिला पनि विवाह भएको जानकारी पाएपछि उनले विवाह नगर्ने बताएका थिए।

प्रदीपका बुवा बेचुले केटी पक्षले बढी दाइजो दिइरहेकाले विवाह गर्न दबाब दिइरहेका थिए।

यता युवतीको विवाह कम दाइजोमै सन्तकुमारसँग तय भएपछि बेचुलाई मृतकको परिवारसँग रिसइवी भएको अनुसन्धानबाट खुलेको सिरहाका प्रहरी प्रवक्ता प्रहरी नायब उपरीक्षक सुवास बुढाथोकीले जानकारी दिए।

“मृतक चन्देश्वरका साइला छोरा वैदेशिक रोजगारमा थिए भने उनको श्रीमती शान्तिदेवी पाल गोलबजारमा कोठा लिएर बस्दै आएकी थिइन्। उनको सासुससुरासँग भने राम्रो सम्बन्ध थिएन। देवरको विवाहमा समेत उनलाई नआउन भनिएको थियो।”– सिरहा प्रहरीको अनुसन्धानले देखाएको हो ।

उनका सासुससुराले ‘तिमी आउनु पर्दैन, तिम्रो चरित्र राम्रो छैन, तिमी बिहेमा आयौँ भने छिमेकीहरु हाम्रो घरमा आउँदैनन्। त्यसैले तिमी बिहेमा नआउनू तिम्रो बच्चाहरुलाई मात्र पठाउनु’ भनेका थिए।

शान्तिलाई चन्देश्वरले अंश नदिएको, खर्च पनि नदिने र माइतीबाट ल्याएको चाँदीको गरगहनासमेत नदिएपछि शान्तिलाई आफ्नो परिवारसँग रिसइवी बढेको थियो।

जेठको पहिलो साता गोलबजारमा शान्तिदेवी, जनिफ मियाँ र बेचुले सन्तकुमार र चन्देश्वरको हत्या गर्ने योजना बनाएका थिए।

प्रहरीका अनुसार मियाँले शान्तिको सासुससुराले धेरै दुःख दिएकाले उनीहरुलाई शान्तिको बाटोबाट हटाउने र यसका लागि शान्तिले ५० हजार दिने भनेपछि बेचुले समेत आफ्नो रिसइबीका कारण हत्या गर्ने योजनामा सहमति जनाएका थिए।

तीनै जनाले हत्या गर्नका लागि मियाँले बन्चरो ल्याउने र बेचुले खुकुरी लिएर जाने योजना बनाएका थिए।

शनिबार साँझ बेचु गोलबजारबाट पैदल हिडेर मियाँसँग भेट हुने स्थानमा पुगेका थिए तर मियाँ नआएपछि घटनास्थलको पूर्वपट्टीको राजदेवी मन्दिरमा गएर केही समय आराम गरेका थिए।

मृतकको घरमा गीत बज्न बन्द भएपछि बाहिर गोठमा सुतेका चन्द्रेश्वरलाई पहिले र त्यसपछि सन्तकुमारको हत्या गरी कोठामा बाहिरबाट चुकुल लगाइ मन्दिरतर्फ फर्केका प्रहरी अनुसन्धानले देखाएको छ।

बेचु मन्दिरमा गएर हातमुख राम्रोसँग धोएर र बालुवाले घोटेर खुकुरी पखालेर पुनः पैदलै घर फर्केको प्रहरी अनुसन्धानबाट खुलेको छ। यस घटनामा अनुसन्धान गर्दै जाँदा तीनै जनालाई पक्राउ गरिएको हो।

सिरहा प्रहरीको अनुसार दाईजो र बिहेको काण्ड भन्दा पनि महिलालाई बिहेमा नआउन भनेपछि हत्याकाण्ड भएको खुलेको हो । तीनै जनालाई पक्राउ गरी थप अनुसन्धान प्रक्रिया अगाडी बढाएको जिल्ला प्रहरी कार्यालय सिरहाका डिएसपी एवम् प्रवक्ता बुढाथोकीले जानकारी दिए ।