जनकपुरः प्रवेश पत्रको लागि पैसा मागेपछि अफिसमै थुनिए एक हेडमास्टर

न्यूज ब्यूरो, जनकपुरधाम । मधेश प्रदेशको राजधानी जनकपुरधामस्थित एक विद्यालयका प्रधानाध्यापकलाई जनप्रतिनीधिले कार्यालयभित्रै थुनेका छन् ।

विद्यार्थीहरुसँग प्रवेश पत्र वापत अवैद्यानिक रकम माग गरेपछि गुनासोको आधारमा उनलाई एक घण्टासम्म कार्यालयमै थुनिनु परेको हो ।

धनुषाको धनौजी गाउँपालिका वडा नम्बर २ स्थित रहेको शँकर माध्यमिक विद्यालयका हेडमास्टर विजय मण्डलले कक्षा १२ को परीक्षा आउँदो १६ गतेदेखि हुनेमा प्रवेश पत्र वापत ९०० रुपैयाँ मागेपछि थुनिएको हो ।

परीक्षार्थीहरुले प्रवेश पत्र माग्न जाँदा आजभोली गर्दै विगत एक सातादेखि प्रवेश पत्र नदिएपछि जनप्रतिनीधिलाई गुनासो गरेपछि वडा नम्बर २ का वडासदस्य रोशन मिश्रको अगुवाई हेडमास्टर थुनिएका हुन् ।

आजभोली गर्दै प्रवेश पत्र नदिएको तथा विहिबार पुनः माग्न जाँदा ९०० रुपैयाँ मागेपछि परीक्षार्थीहरुले जनप्रतिनीधिलाई गुनासो गरेका थिए । प्रवेश पत्र वापत ९०० रुपैयाँ अवैद्यानिक रहेको भन्दै जनप्रतिनीधिले सम्झाएपनि हेडमास्टर जबरदस्ती गरेपछि थुनिएको बताइएको छ ।

विद्यालय व्यवस्थापन समितिका अध्यक्ष विनोद मिश्र र हेडमास्टर विजय मण्डलको विरोधमा परीक्षार्थीहरुले नारावाजी गर्दै कारवाहीको माग समेत गरेको थियो ।

वडासदस्य रोशन मिश्रले विद्यालय प्रशासनसँग समन्वय गरेपछि परीक्षार्थीहरुलाई तत्कालै प्रवेश पत्र उपलब्ध गराइएको जनाइएको छ । आगामी जेठ १६ गतेदेखि कक्षा १२ को परीक्षा सँचालन हुने भएको छ ।