मधेश प्रदेशको निजगढमा बनाउने भनिएको ईन्टरनेश्नल एयरपोर्ट नबनाउन सर्वोच्चको आदेश

न्यूज ब्यूरो, जनकपुरधाम । बाराको निजगढमा अन्तर्राष्ट्रिय विमानस्थल बनाउने सरकारको निर्णय सर्वोच्च अदालतले बदर गरिदिएको छ ।

निजगढमा विमानस्थल बनाउन सरकारले गरेका सबै निर्णय न्यायाधीशहरु हरिकृष्ण कार्की, विश्वम्भरप्रसाद श्रेष्ठ, ईश्वरप्रसाद खतिवडा, प्रकाशमान सिंह राउत र मनोजकुमार शर्माको बृहत पूर्ण इजलासले उत्प्रेषणको आदेशले बदर गरिदिएको हो ।

वातावरण सरक्षण अभियन्ता र वरिष्ठ अधिवक्ताहरुले दायर गरेको रिटमा सुनुवाइ गर्दै बिहीबार सर्वोच्चको बृहत पूर्ण इजलासले अन्तर्राष्ट्रिय विमानस्थल बनाउनुपर्ने भए ऐन, कानुन र विधिशास्त्रीय मान्यता अनुसार उपयुक्त विकल्प खोज्न परमादेश दिएको सर्वोच्च अदालतका प्रवक्ता विमल पौडेलले जानकारी दिए ।

निजगढमा विमानस्थल निर्माण गर्दा वातावरणीय क्षति धेरै हुने भन्दै वरिष्ठ अधिवक्ता प्रकाशमणि शर्मासमेत र रञ्जुहजुर पाँडेसमेतले छुट्टाछुट्टै रिट दायर गरेका थिए ।

पर्यावरण अभियन्ता सुरेश कुमार शर्माले निरन्तर पर्यावरण बचाउको लागि समाजिक सँजालसहित भौतिक अभियानहरु निरन्तर गर्दै आएका छन् । उनकै अथक प्रयासले लाखौँ रुख काटेर बनाउने भनिएको एयरपोर्ट अब सोही ठाउँमा नबनाउन सर्वोच्चले आदेश दिएको हो ।

वन काटेर एयरपोर्ट बनाउँदा तराई मधेशको प्राणवायू भनिने निजगढ वनको विनाशपछि यहाँका मानिसहरुमा पानीको हाहाकार हुने सम्भावनालाई बारम्बार उनले उल्लेख गर्दै आएका थिए । तर, सरकारले जिद्द गरेपछि उनले सर्वोच्च गुहारेपछि आज सफलता पाएका छन् ।