शहिदनगरका नयाँ नगर प्रमुख यादवको निर्णयः फूसको घरमा जस्तापाता, गरिबलाई बिजुली निःशुल्क

न्यूज ब्यूरो, जनकपुरधाम । धनुषाको शहिदनगर नगरपालिकाका नव निर्वाचित नगर प्रमुख (मेयर) दिनेश प्रसाद यादवले पदभार ग्रहण गर्दै पाँच निर्णय प्राथमिकतामा राखी हस्ताक्ष गरेका छन् ।

मँगलबार प्रदेशको राजधानी जनकपुरधामस्थित सपथ ग्रहणपछि गृहपालिका शहिदनगर फर्केका मेयर यादवले विधिवत रुपमा पदभार ग्रहण गर्दै पाँच वटा निर्णयमा हस्ताक्षर गरेका छन् ।

उनले सर्वप्रथम समाजिक सुरक्षा भत्ताको अनियमिततालाई पूर्णतः नियमित गर्ने निर्णय गरेका छन् । विभिन्न समयमा समाजिक सुरक्षा भत्ता समयमा पहुँच नहुँदा नगरका वृद्धवृद्धा तथा बालबालिकाहरुलाई समस्या भएको भन्दै समाजिक सुरक्षा भत्ता नियमित पार्ने निर्णय गरेका छन् ।

पदभार सम्हाल्दै मेयर यादवले शहिदनगर नगरपालिकाभरि रहेको फूसको घरलाई विस्थापित गरी सो ठाउँमा जस्तापाताको घर बनाउने दोस्रो ठुलो निर्णय गरेका छन् । गरिब, दलित, अल्पसँख्यक वस्तीलाई लक्षित गरी उनले केही दिनभित्रै जस्तापाता चढाउने निर्णय गरेका छन् ।

सोही क्रममा शहिदनगर नगरपालिकाको चारैतर्फ विभिन्न सडक सँजालसँग जोडिने गरी रिँग रोड (चक्रपथ) निर्माणको प्रक्रिया शिघ्र अगाडी बढाइने निर्णय गरेका छन् ।

नगरपालिकाका प्रमुख प्रशासकीय अधिकृत (उपसचिव स्तर) रामकिशोर महतोले मेयर यादवलाई मँगलबार अपरान्ह गराएको पदभार ग्रहणको क्रममा गरिबहरुको बिजुली निःशुल्क गर्ने सम्बन्धमा छलफल गरी २० युनिटसम्मको बिजुली निःशुल्क गर्ने निर्णय समेत गरेका छन् ।

कृषि बिजुलीको लागि किसानहरुलाई राहत हुने गरी स्थानीय सरकारको तर्फबाट समेत सहुलियत दिने गरी बिजुलीको बारेमा पछि निर्णय गरिने उनले बताए ।

न्यूज ब्यूरोसँग कुराकानी गर्दै नव निर्वाचित मेयर यादवले शहिदनगरको अनियमित रहेको शिक्षा प्रणाली सुधार, स्वास्थ्यमा थप उर्जा लगानी गर्ने गरी कार्यहरु आगामी दिनमा गर्ने बताए ।

उनले भने,–“आज पदभार ग्रहण नै गरेको छु, एकैदिनमा धेरै सोच्न पनि सकिन्न, अब नियमित कार्यालय र काममा आएपछि जनभावना अनुसारको कार्य गर्न उत्प्रेरणा सँगै जनताको सल्लाह सुझाको आधारमै काम गर्नेछु । गलत गरेको खण्डमा गुनासो र असल कार्यको लागि सल्लाह समेत दिन म आग्रह गर्दछु ।”