वीरगँजका नयाँ मेयर सिँहलाई जसपाका नेता यादवले चाँदीको मुकट लगाएर दिए बधाई

न्यूज ब्यूरो, वीरगँज । वीरगञ्ज महानगरपालिका मेयरमा निर्वाचित भएका राजेशमान सिंहलाई संघीय सांसद् प्रदीप यादवले चाँदीको मुकुट लगाएर बधाई दिएका छन् ।

मंगलबार बिहान सम्पन्न वीरगञ्ज महानगरपालिकाको मतगणनाको अन्तिम मतपरिणाम अनुसार ४६ हजार २ सय १५ मत पाएर मेयर पदमा निर्वाचित भएका जनता समाजवादी पार्टी नेपालका राजेशमान सिंहलाई सांसद् यादवले चाँदीको मुकुट लगाएर बधाई सहित सम्मान गरेका हुन् ।

मुकुट लगाएर तस्विर सार्वजनिक गर्दै यादवले सिंहक जित सम्पूर्ण वीरगञ्जवासीको जित भएको प्रतिक्रिया दिएका छन् ।

यादवले हिन्दी र नेपाली भाषा मिसाएर लेखेका छन् “हम साथ लड़े थे, साथ जिते हैं। हम साथ रहेंगे, साथ चलेंगे । यो जीत हाम्रो होइन, यो हरेक वीरगञ्जबासी को हो ।”

सार्वजनिक गरिएको दुई वटा तस्विरमध्ये एउटामा यादवले सिंहलाई अंगालो मारेका छन् भने अर्कोमा दुवैले सँगै मात उठाएको देख्न सकिन्छ ।

सिंहलाई मेयर जिताउनुमा सांसद् यादवको ठूलो योगदान छ । यादवले नै सिंहलाई लोसपाबाट ल्याएर जसपा प्रवेश गराएका थिए ।

वीरगञ्जका निवर्तमान मेयर विजयकुमार सरावगी जसपा त्यागेर एमाले गएपछि उनिसँग प्रतिष्पर्धा गर्न यादवले सिंहलाई जसपा ल्याएर मेयरको उम्मेदवार बनाएका थिए ।

सिंह गत स्थानीय तहको निर्वाचनमा लोसपाबाट मेयर लडेर तेस्रो भएका थिए ।