जनकपुरधामको मेयरमा काँग्रेसका बागी मनोज साह सुडी निर्वाचित, छत्ताको पत्ता साफ

न्यूज ब्यूरो, जनकपुरधाम । मधेश प्रदेशको राजधानी जनकपुरधामको नगर प्रमुखको लागि नेपाली काँग्रेसका बागी उम्मेदवार मनोज साह सुडी निर्वाचित भएका छन् ।

सोमबार भएको अन्तिम मतपरिणाम अनुसार उनले १३४६५ मत ल्याएर निर्वाचित भएका छन् भने गठबन्धनको तर्फबाट जसपाबाट उम्मेदवार बनेको पूर्व मेयर लालकिशोर साह चौथो स्थानमा छन् ।

जनकपुरधाम उपमहानगरपालिकाको २५ वटा वडामध्ये मात्र एक वडा नं. १४ मा मात्र वडाध्यक्षमा पुण्य प्रताप यादव निर्वाचित हुन सकेका छन् । बाँकीको २४ वटा वडामा काँग्रेस, एमाले, माओवादी, तमलोपा लगायतका पार्टीका उम्मेदवार निर्वाचित भएका छन् ।

पाँच दलिय गठबन्धनको तर्फबाट मनोज साह सुडीलाई जनकपुरधामको मेयरको रुपमा नेपाली काँग्रेसबाट टिकट दिनुपर्ने अडान राखेपनि अन्त्यसम्म जसपाका लालकिशोर यादवको पक्षमा टिकट गएपछि मनोज साह सुडीले बागी उम्मेदवारी दिँदै स्वतन्त्रबाट लडेका थिए ।

स्वतन्त्रबाट घण्टाघर छापमा लडेका मनोज साह सुडी जनकपुरधाम उपमहानगरपालिकाको नयाँ नगर प्रमुखको रुपमा निर्वाचित भएका छन् । उनलाई काँग्रेसले टिकट नदिएपछि उनी सयौँ आफ्ना समर्थक लिएर काँग्रेस छाडेर स्वतन्त्र उम्मेदवारी दिएका थिए ।

एमालेका शिवशँकर साह हिरा ९५३२ मत ल्याएर दोस्रो स्थानमा छन् भने लोकतान्त्रिक समाजवादी पार्टीका मनोज कुमार चौधरी ५३६० मत ल्याएर तेस्रो स्थानमा छन् । जसपाको लालकिशोर साह ५१९४ मत प्राप्त गरी चौथो स्थानमा रहेका छन् ।

चुनाव अवधीभरि सधैँ विवाद र चर्चामा रहँदै आएका रमण कन्सट्रक्सनका सँचालक एवम् निर्माण व्यावसायी बलराम महतो भने पाँचौ नम्बरमा ४२९० मत प्राप्त गरेका छन् भने आफ्नो पार्टीलाई लत्याएर अधिक लोभमा परी एमाले पसेका जानकीराम साहले एमालेबाट पनि टिकट नपाएपछि स्वतन्त्र उम्मेदवारी दिँदा छैठौँ स्थानमा २०७२ मत मात्र प्राप्त गर्न सकेका छन् ।

चुनावकै मुखमा पार्टी बदलेका जानकी राम साह अब घरको न घाटको भएका छन् । उनी वडाध्यक्षमा उम्मेदवारी दिँदा जित्ने प्रबल सम्भावना भएको बेला केही व्यक्तिको उक्साहटमा अधिक लोभमा परेपछि वित्यसा भएको छ ।

यस्तै उपमेयरमा नेपाली काँग्रेसका १५५२५ मत ल्याएर निर्वाचित भएका छन् । उनी केही दिनअघि गठबन्धनका मेयरका उम्मेदवार लालकिशोर साहसँग सँगै खाना खाएको बाहिर मिडियाबाजी गरेर जसपाको भोँट पनि आफूतर्फ तान्न सफल भएका छन् । एमालेकी रुणा देवी झा भने १०८५ मत प्राप्त गरेकी हुन् ।