जीतको उन्मादः चुनावमा जितेपछि विजयी उत्सव मनाउन एक दिने सार्वजनिक विदाको घोषणा

न्यूज ब्यूरो, जनकपुरधाम । गत बैशाख ३० गते सम्पन्न स्थानीय तह निर्वाचनको क्रममा नव निर्वाचित जनप्रतिनीधिहरुको विजयी उत्सव भन्दै एक दिने सार्वजनिक विदाको निर्णय गरिएको छ ।

मधेश प्रदेशको सप्तरी जिल्लास्थित रहेको रुपनी गाउँपालिकाले आज सोमबार एकदिने सार्वजनिक विदाको घोषणा गरेको छ ।

चुनावमा नव निर्वाचित जनप्रतिनीधिहरुको विजयी उत्सव कारण देखाउँदै गाउँपालिका भित्रको सम्पूर्ण शैक्षिक सँस्थानहरु बन्द गरी सार्वजनिक विदा दिएको हो ।

गाउँपालिकाका प्रमुख प्रशासकीय अधिकृत अरबिन्द कुमार चौधरीद्धारा जारी गरिएको सूचनामा नव निर्वाचित गाउँपालिका अध्यक्ष दिनेश कुमार यादवको आदेश अनुसार एक दिने सार्वजनिक विदा दिएको हो ।

सोमबार गाउँपालिकाभरिको सरकारी अड्डा, शैक्षिक सँस्थानहरु बन्द रहेको छ । गाउँपालिका अध्यक्षमा निर्वाचित भए लगत्तै यस्तो निर्णय गरेपछि उनको चौतर्फी आलोचना भएको छ ।