तीनदिनपछि हुने थियो बिहे, बाबुछोराको एकैसाथ हत्या !

न्यूज ब्यूरो, सिरहा । आउँदो जेठ ११ गतेको लागि बिहेको दिन तोकिएको एक युवकको बुवासहित हत्या गरिएको छ ।

सिरहामा बाबु छोराको धारीलो हतियार प्रहार गरी हत्या भएको हो। घरमै सुतिरहेको अवस्थामा सिरहाको अर्नमा गा.पा .१ महनौरका अन्दाजी ६० वर्षिय चुलाही भन्ने चन्देश्वर पाल र उनको १९ वर्षिय छोरा सन्त कुमार पालको गएराती हत्या भएको हो।

सन्त कुमारको यहि जेष्ठ ११ गते विवाह हुने भएकाले गाउँकै महिलाहरु विवाह गीत गाएर करिब १२ बजे सुतेका थिए । बाबु छोराको करिब २ बजे राती हत्या भएको स्थानीयले जानकारी दिए।

स्थानीयका अनुसार राती करिब १२ बजे सम्म गीत बजि रहेको थियो, विहान पख करिब ३ बजे हत्याको घटना गाउँ भरी फैलि सकेको हुनाले २ बजेको आसपासमा घटना भएको बताए।

घरको छुट्टाछुट्टै कोठामा बुबा र छोरा सुतेका थिए। उनीहरुलाई सुतिरहेकै ठाउँमा धारीलो हतियार प्रहार गरी हत्या गरेको बताइएको छ।

बुवा एकलै सुतेको र सन्त कुमारसँग गाउँकै १०–१२ बर्षको बालक सुतेका थिए। उनले नै हत्या भएको थाहा पाएपछि घरका अन्य सदस्यलाई र गाउँलेलाई सुनाएको बताइएको छ।

महनौर बजारमै हार्डवेयर पसलमा काम गर्दै आएका सन्त कुमार इमान्दार र असल छविको युवा रहेको स्थानीयले बताए।

घटनाको जानकारी पाए लगतै विहान ४ बजे नै घटनास्थल पुगेको प्रहरीले घटनास्थल शिल गरेर अनुसन्धान गरिरहेको छ।

जिल्ला प्रहरी कार्यालय सिरहाका सूचना अधिकारी डीएसपी सुवास ढकालले घटनाबारे तत्काल केही बताउन नसकिने बताए। उनले भने, ‘घटना भएको छ, हामीले विभिन्न ढङ्गले अनुसन्धान गरिरहेका छौं, तत्काल घटनाको बारेका केही बताउन सकिन्न।’

प्रहरीले अनुसन्धानका लागि तालिम प्राप्त कुकुरको पनि सहयोग लिएको छ।