सिरहाको धनगढीमाई नगरपालिकामा बिना हस्ताक्षरको मतपत्र भेटिएपछि तनाव, दुई राउण्ड फायर

न्यूज ब्यूरो, सिरहा । मधेश प्रदेशको सिरहा जिल्लास्थित धनगढीमाई नगरपालिकाको मतगणनामा विवाद भएपछि मगणना कार्य स्थगित भएको छ ।

मतगणनाको क्रममा निर्वाचन अधिकृतको हस्ताक्षर नै नभएको मत पत्र भेटिएपछि विवाद भएको हो । मतपत्र भेटिएपछि अहिले मतगणना कार्य स्थगित भएको छ ।

निर्वाचन अधिकृतकै मिलोमत्तोमा मतपेटिकामा बिना हस्ताक्षरको मतपत्र खसेको भन्दै नेपाली काँग्रेसले पुनः चुनावको माग गरेको छ । बिना हस्ताक्षरकै ४ वटा मतपत्र भेटिएको हो ।

निर्वाचन अधिकृत महेन्द्र महतोको मिलोमत्तोमै कुनै कर्मचारीले सो भित्र मत पत्र हालेको आरोप लगाउँदै पुनः निर्वाचनको माग गर्दै आन्दोलन सुरु भएको छ ।

नेपाली काँग्रेसका मेयरका उम्मेदवार रामचन्द्र यादवले पुनः मतदानको माग गर्दै आन्दोलन गरेपछि प्रहरीले दुई राउण्ड हवाय फायर गरेको छ । प्रहरीले स्थिति नियन्त्रणमा लिनको लागि हवाय फायर गरेको हो ।

धनगढीमाई नगरपालिकाको वडा नम्बर ८ को मतगणनाको क्रममा विना हस्ताक्षरको मतपत्र भेटिएपछि पुनः मतगणनाको माग गरिएको छ ।